მთავრობაში დაგეგმილი ეს საკადრო და სტრუქტურული ცვლილებები უდავოდ მიმართულია ხარჯების ოპტიმიზაციის, პრიორიტეტების სწორად დაჯგუფების და ადამიანური რესურსების უკეთ გამოყენებაზე, - ამის შესახებ ჟურნალისტებს საპარლამენტო უმრავლესობის წევრმა ნინო წილოსანმა განუცხადა.

მისი თქმით, ენერგეტიკის, ბუნებრივი რესურსების მართვისა და ეკონომიკის სამინისტროს გაერთიანება უფრო ეფექტურს გახდის ეკონომიკური მიმართულებით მთავრობის მუშაობას.

”ყურადღებას გავამახვილებდი ეკონომიკური პლატფორმის გაძლიერების მიზნით ენერგეტიკის, ბუნებრივი რესურსების მართვის და ეკონომიკის სხვა მიმართულებების ერთ სტრუქტურაში თავმოყრაზე - ეს უფრო ეფექტურს გახდის ამ მიმართულებით ხელისუფლების მუშაობას. შესაბამის სამინისტროებში დაგეგმილი ცვლილებები იმაზე მიუთითებს, რომ ამ მიმართულებებით უფრო მეტი გვაქვს სამუშაო და ჩვენ ვიღებთ ამ გამოწვევას. პირადად მე მივესალმები წარმოდგენილ ცვლილებებს და იმედი მაქვს, ამ პროექტის მხარდაჭერით პარლამენტი ხელს შეუწყობს აღმასრულებელი ხელისუფლების უფრო ეფექტიან და მიზანმიმართულ მუშაობას”, - განაცხადა წილოსანმა.