სასტუმრო "ლეოგრანდთან" აზერბაიჯანის კონსული საქართველოში, რაშიდ ისმაილოვი იმყოფებოდა. მან სასტუმრო "ლეოგრანდში" გარდაცვლილების ხსოვნას პატივი მიაგო და განაცხადა, რომ ეს არის დიდი ტრაგედია. რაშიდ ისმაილოვმა საქართველოს აზერბაიჯანის სახელით სოლიდარობა გამოუცხადა.

"ეს არის დიდი ტრაგედია. აზერბაიჯანის სახელით საქართველოს სოლიდარობას ვუცხადებთ. ჩვენ ქართველი ხალხის გვერდით ვართ და ვუსამძიმრებთ გარდაცვლილთა ოჯახებს"- აცხადებს რაშიდ ისმაილოვი.

ბათუმში, სასტუმრო "ლეოგრანდში" ხანძარი 24 ნოემბერს, დაახლოებით 20:00 საათზე გაჩნდა. ძლიერი დაკვამლიანების გამო სასტუმროდან მოქალაქეების ევაკუაცია მოხდა.

ხაძრის შედეგად 11 ადამიანი დაიღუპა, რომელთაგან 10 საქართველოს და 1 ირანის რესპუბლიკის მოქალაქეა, ჰოსპიტალიზებული იყო 21 ადამიანი.

მომხდარ ფაქტთან დაკავშირებით, გამოძიება საქართველოს სსკ-ს 243-ე მუხლის მე-3 ნაწილით მიმდინარეობს, რაც სახანძრო უსაფრთხოების წესის დარღვევას გულისხმობს, რამაც ორი ან მეტი ადამიანის სიცოცხლის მოსპობა ან სხვა მძიმე შედეგი გამოიწვია.