სასტუმრო "ლეოგრანდში" ხანძრის შედეგად დაღუპულები ბათუმის ღვთისმშობლის შობის სახელობის საკათედრო ტაძრიდან უკვე გადაასვენეს.ტაძარში 5 დაღუპული იყო დასვენებული და მათ დღეს დაკრძალავენ.

გარდაცვლილთა ოჯახებს სასტუმრო "ლეოგრანდის" მფლობელმა, აჭარის მთავრობის თავმჯდომარე ზურაბ პატარაძემ, დევნილთა და განსახლების მინისტრმა სოზარ სუბარმა და თავდაცვის მინისტრმა ლევან იზორიამ მიუსამძიმრეს. პარაკლისი ბათუმისა და ლაზეთის მიტროპოლიტმა მეუფე დიმიტრიმ ჩაატარა.

ბათუმში, სასტუმრო "ლეოგრანდში" ხანძარი 24 ნოემბერს, დაახლოებით 20:00 საათზე გაჩნდა. ძლიერი დაკვამლიანების გამო სასტუმროდან ათეულობით მოქალაქის ევაკუაცია განხორციელდა.

ხაძრის შედეგად 11 ადამიანი დაიღუპა, რომელთაგან 10 საქართველოს და 1 ირანის რესპუბლიკის მოქალაქეა, ჰოსპიტალიზებული იყო 21 ადამიანი.

მომხდარ ფაქტთან დაკავშირებით, გამოძიება საქართველოს სსკ-ს 243-ე მუხლის მე-3 ნაწილით მიმდინარეობს, რაც სახანძრო უსაფრთხოების წესის დარღვევას გულისხმობს, რამაც ორი ან მეტი ადამიანის სიცოცხლის მოსპობა ან სხვა მძიმე შედეგი გამოიწვია.