საქართველოს თავდაცვის მინისტრი ლევან იზორია ბათუმში, სასტუმრო „ლეოგრანდში“ დაღუპულთა პანაშვიდს დაესწრო. როგორც მან ღვთისმშობლის შობის სახელობის საკათედრო ტაძართან ჟურნალისტებს განუცხადა, ხანძრის გამომწვევი მიზეზები დროულად უნდა დადგინდეს, რის გამოც გამოძიება აქტიურად მიმდინარეობს. მინისტრმა სასტუმრო „ლეოგრანდში“ დაღუპულთა ოჯახებსა და ახლობლებს მიუსამძიმრა.

”საქართველოს თითოეული მოქალაქის დიდი გულისტკივილია ის, რაც ბათუმში მოხდა. ჩვენ ოჯახების მწუხარებას ვიზიარებთ. ძალიან მძიმე სურათი დაგვხვდა. მიმძიმს, რომ ეს ემოციები გამოვხატო. გამოძიება მიმდინარეობს და ყველას ინტერესშია, რაც შეიძლება დროულად დადგინდეს, რა იყო ხანძრის გამომწვევი მიზეზები და დამნაშავემ აგოს პასუხი“,- აღნიშნა ლევან იზორიამ

ბათუმში, სასტუმრო "ლეოგრანდში" ხანძარი 24 ნოემბერს, დაახლოებით 20:00 საათზე გაჩნდა. ძლიერი დაკვამლიანების გამო სასტუმროდან ათეულობით მოქალაქის ევაკუაცია განხორციელდა.

ხაძრის შედეგად 11 ადამიანი დაიღუპა, რომელთაგან 10 საქართველოს და 1 ირანის რესპუბლიკის მოქალაქეა, ჰოსპიტალიზებული იყო 21 ადამიანი.

მომხდარ ფაქტთან დაკავშირებით, გამოძიება საქართველოს სსკ-ს 243-ე მუხლის მე-3 ნაწილით მიმდინარეობს, რაც სახანძრო უსაფრთხოების წესის დარღვევას გულისხმობს, რამაც ორი ან მეტი ადამიანის სიცოცხლის მოსპობა ან სხვა მძიმე შედეგი გამოიწვია.