თბილისის საბავშვო ბაგა-ბაღების მართვის სააგენტოს ხელმძღვანელმა კახაბერ გვანცელაძემ ის ორი სამშენებლო პროექტი დაათვალიერა, რომელსაც კომპანია „გიკო“ ახორციელებს.

როგორც „ინტერპრესნიუსს“ თბილისის მერიიდან აცნობეს, კომპანია „გიკო“ ახალ საბავშვო ბაღებს ზუგდიდის ქუჩა N3-სა და ნუცუბიძის მეოთხე მიკრორაიონში აშენებს. კახაბერ გვანცელაძემ ორივე მშენებლობა თბილისის მერიის ლაბორატორიის ექსპერტებთან ერთად დაათვალიერა.

აღნიშნული მშენებლობები თბილისის მერის კახა კალაძის გადაწყვეტილებით, საექსპერტო დასკვნის მომზადებამდე შეჩერდა. მიღებული გადაწყვეტილების მიზეზი ის ხარვეზები გახდა, რომელიც მერიის აუდიტის სამსახურმა ამავე კომპანიის მიერ აშენებულ N33-ე ბაგა-ბაღში აღმოაჩინა.