კახა კალაძე არ აკონკრეტებს, რამდენი თანამშრომელი გათავისუფლდება სამსახურიდან მეტროსადგურ „ვარკეთილში“ მომხდარი შემთხვევის გამო
თბილისის მერი კახა კალაძე არ აკონკრეტებს, სატრანსპორტო კომპანიის რამდენი თანამშრომელი გათავისუფლდება სამსახურიდან მეტროსადგურ „ვარკეთილში“ მომხდარი შემთხვევის გამო.
კალაძემ დღეს ჟურნალისტებს მხოლოდ ის განუცხადა, რომ თბილისის მერიის მხრიდან ამ საკითხზე ჩატარდა მოკვლევა და დარღვევები დაფიქსირდა.
„სატრანსპორტო კომპანიიდან თანამშრომლების რაოდენობას რაც შეეხება, მე გუშინ დავავალე კომპანიის ხელმძღვანელს, ყველა ის ადამიანი, ვინც მონაწილეობდა სატენდერო ღონისძიებებში, გათავისუფლდეს სამსახურიდან.
ამ მიმართულებით მიმდინარეობს გამოძიება და დაველოდოთ გამოძიების შედეგებს. თუმცა, მოკვლევით, რომელიც ჩვენი მხრიდან ჩატარდა, არის გარკვეული დარღვევები და მიზანშეწონილად მიმაჩნია, რომ ამ ადამიანებმა თანამდებობა დატოვონ“, - განაცხადა კალაძემ.
როგორც ცნობილია, ვარკეთილის მეტროში ჭერის ჩამონგრევის შედეგად 14 ადამიანი დაშავდა.
