მუსტაფა ემრე ჩაბუქი შიშობს, რომ არსებობს მასზე თავდასხმის, გატაცების და მისი სიცოცხლის ხელყოფის საფრთხე, რის გამოც, მთავარ პროკურორს მივმართავთ, ჩასვას ის დაცვის სახელმწიფო პროგრამაში, - ამის შესახებ დემირელის კოლეჯის მენეჯერის ადვოკატმა სოსო ბარათაშვილმა პროკურატურაში ჟურნალისტებს განუცხადა.

სოსო ბარათაშვილის განცხადებით, აზერბაიჯანში დაფიქსირდა შემთხვევა, როცა მსგავსი ბრალდებით საექსტრადიციო პატიმრობიდან გათავისუფლებული პირი გაიტაცეს და თურქეთში აღმოჩნდა. ადვოკატის თქმით, მსგავსი შემთხვევისგან თავდაცვის მიზნით, მუსტაფა ემრე ჩაბუქი უნდა ჩასვან დაცვის სახელმწიფო პროგრამაში.

„საქართველოს მთავარ პროკურორს მივმართეთ მუსტაფა ემრე ჩაბუქის დაცვის სახელმწიფო პროგრამაში ჩართვის თაობაზე. როგორც ცნობილია, მისი მეუღლე და ორი არასრულწლოვანი შვილი ჩართული არიან ამ პროგრამაში.

ჩაბუქის გათავისუფლების შემდეგ კვლავ გაჩნდა სოციალურ ქსელებში ინფორმაციები, რომელიც გვაფიქრებინებს, რომ არსებობს მისი სიცოცხლის ხელყოფის საფრთხე, ამიტომ ვითხოვთ დაცვის სპეციალურ პროგრამაში ჩართვას.

არსებობს საგანგაშო პრეცედენტი, როცა აზერბაიჯანში ანალოგიური ბრალდებით საექსტრადიციო პატიმრობიდან გათავისუფლებული პირი გაიტაცეს და ის აღმოჩნდა თურქეთში“, - განაცხადა სოსო ბარათაშვილმა.

დემირელის კოლეჯის მენეჯერმა მუსტაფა ემრე ჩაბუქმა დაცვის სახელმწიფო პროგრამაში ჩართვის მოთხოვნით, დღეს პროკურატურაში განცხადება შეიტანა.