გენერალ სამსონ ქუთათელაძის მკვლელობის საქმეზე დაკავებული გიორგი ჭანტურია სასამართლომ კვლავ პატიმრობაში დატოვა

მოსამართლე ეკატერინე პართენიშვილმა გენერალ სამსონ ქუთათელაძის მკვლელობის საქმეზე დაკავებული გიორგი ჭანტურია კვლავ პატიმრობაში დატოვა. მოსამართლემ არ დააკმაყოფილა დაცვის მხარის შუამდგომლობა და გიორგი ჭანტურიას აღკვეთის ღონისძიების სახედ ძალაში კვლავ პატიმრობა დაუტოვა.

დაცვის მხარემ დღევანდელ წინასასამართლო სხდომაზე, მოსამართლის წინაშე მტკიცებულებათა დაუშვებლად ცნობის თაობაზე სხვა შუამდგომლობებიც დააყენა. კერძოდ, თედორაძის მოწმეთა ნუსხიდან ამოღება, ფარული საგამოძიებო მოქმედებების დროს ამოღებული ვიდეო და აუდიო ჩანაწერების ბათილად ცნობა და ჭანტურიას სახლის ჩხრეკის ოქმის გაუქმება, რა დროსაც სახლიდან ცეცხლსასროლი იარაღი და საბრძოლო მასალა ამოიღეს.

ბრალდებისა და დაცვის მხარეებმა, პროცესზე იმ მტკიცებულებების ნუსხა წარადგინეს, რომელიც გამოძიების ფარგლებში მოიძიეს და საქმის მასალებშია. კერძოდ, როგორც პროკურორი ლევან ჯალაღანია აცხადებს, გამოძიების პროცესში გამოიკითხა 390-მდე მოწმე, საქმეში დევს მოწმეთა ჩვენებები, რომლებიც ადასტურებს, რომ დანაშაული გიორგი ჭანტურიამ ჩაიდინა. ბრალდების მხარის პოზიციას კატეგორიულად არ ეთანხმება დაცვის მხარე.

გენერალ სამსონ ქუთათელაძის მკვლელობის საქმეზე, გიორგი ჭანტურიას წინასასამართლო სხდომა 28 სექტემბერს განახლდება.

გენერალი სამსონ ქუთათელაძე, ე.წ. სტამბოლის ბაზრის ტერიტორიაზე საკუთარ კაბინეტში 15 იანვარს ნახეს მოკლული. მას ცეცხლსასროლი იარაღიდან 6 ტყვია ჰქონდა მოხვედრილი.

გიორგი ჭანტურია სამართალდამცველებმა რვა თვის შემდეგ, რუსთავში, ყაზბეგის ქუჩაზე მამის სახოვრებელ სახლში 7 აგვისტოს, ღამით ჩატარებული ჩხრეკის შემდეგ დააკავეს. მისი სახლიდან ავტომატური ცეცხლსასროლი იარაღი და ვაზნები ამოიღეს.

სისხლის სამართლის საქმე გიორგი ჭანტურიას მიმართ, საქართველოს სსკ-ის 108-ე მუხლით, სსკ-ის 236-ე მუხლის მეორე და მესამე ნაწილებით აღიძრა, რაც განზრახ მკვლელობას, ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.

დავით იაკობიძე - მთავარია, კარგად ვიცოდეთ, რა გვინდა სოფლის მეურნეობასა და ეკონომიკაში და ვიცოდეთ, ვის შევთავაზოთ პარტნიორობა
მინდია დავითაძე - აუცილებელია საქპატენტის უწყვეტ რეჟიმში ფუნქციონირება, რათა ბიზნესს შექმნილ ვითარებაში პრობლემა არ შეექმნას
ქართული პრესის მიმოხილვა 09.04.2020
ვაჟა ბერიძე - მთავრობა სწრაფად და ეფექტიანად რეაგირებს გამოწვევებზე, ეს სადღეისოდ საკმარისია, მაგრამ ტაში და ვაშა ჯერჯერობით ნაადრევია
„გაგუას კლინიკამ“ რესპუბლიკურ საავადმყოფოს 10 ელექტროფუნქციური საწოლი საჩუქრად გადასცა
„ტერასა ჯგუფმა“ ორასამდე სოციალურად დაუცველ ოჯახს საკვები პროდუქტები გადასცა
"ლიბერთი ბანკის" მმართველ გუნდში ცვლილებებია
"ბაზისბანკის" ციფრული არხებით სარგებლობა უფასოა