ვანო მერაბიშვილის ოჯახის მიერ მოწვეული ექიმები, რომლებიც "მედიქლაბ ჯორჯიას" კლინიკაში მივიდნენ ონკოქირურგიის, ნეიროქირურგიისა და თერაპიის სპეციალისტები არიან, - ამის შესახებ ჟურნალისტებს ვანო მერაბიშვილის ადვოკატმა გიორგი ჩივიაშვილმა განუცხადა.

მისი თქმით, ოჯახი ითხოვდა, რომ კონსილიუმს, რომელსაც "მედიქლაბ ჯორჯიას" კლინიკის ექიმები გამართავენ, დასწრებოდა მათ მიერ მოწვეული სამი ექიმი, რაზეც თანხმობა მიიღეს. ადვოკატის თქმით, თუ შესაძლებლობა ექნება, კონსილიუმს თავადაც დაესწრება. ადვოკატის ინფორმაციით, ექიმები, რომლებიც ოჯახმა მოიწვია, პროფესიონალები არიან. ამასთან, ჩივიაშვილი არ გამორიცხავს, რომ მერაბიშვილს დიაგნოზი დღესაც ვერ დაუსვან, თუმცა იმედოვნებს, რომ ასე არ იქნება.

"ორი თვის განამვლობაში ჩვენ, პაქტიკულად, დიაგნოზი ვერ მივიღეთ. რეალურად, ვანო მერაბიშვილი არ მკურნალობს იმ დიაგნოზის მიხედვით. ეს არის სინდრომი, რასაც ამდენი ხანი ვამბობდით. დღეს, ვინაიდან კონსილიუმი უნდა შეიკრიბოს და მოწვეული ჰყავთ რამდენიმე ექიმი, ჩვენი თხოვნა იყო, რომ ამ კონსილიუმში ჩართულიყვნენ მერაბიშვილის ოჯახის მიერ მოძიებული ექიმები. რადგან დაგვთანხმდენენ, ეს უკვე კარგია. მეც მაქვს სურვილი, რომ ტექნიკურად, თუ მოხერხდა მეც დავესწრო შეხვედრას. ამ ორი თვის განმავლობაში მარტივ რაღაცს ვითხოვთ, ვანო მერაბიშვილს დაუსვან დიაგნოზი და უმკურნალონ დასმული დიაგნოზის მიხედვით. რაც შეეხება ოჯახის მიერ მოწვეულ ექიმებს, მე ვიცი, რომ ისინი არიან პროფესიონალები. არის ონკოქირურგი, ნეიროქირურგი და თერაპევტი. როგორც მახსოვს ამ სპეციალობის ექიმები არიან", - განაცხადა ჩივიაშვილმა.