ვფიქრობ, იმის გამო, რომ სასესხო დავალიანების განულება შეიძლებოდა შეფასებულიყო მოსყიდვად, ამაზე უარის თქმა და ნახევარი მილიონი ადამიანის დატოვება ამ მძიმე ტვირთის ქვეშ, არასწორია, - ამის შესახებ ჯანდაცვის მინისტრმა დავით სერგეენკომ განაცხადა.

მისივე განცხადებით, ახალმა პრემიერმა მისი დამტკიცებისთანავე განაცხადა, რომ ერთ–ერთი პრიორიტეტი ჭარბვალიანობასთან ბრძოლა იქნებოდა.

„პირველ რიგში მე ვხედავ იმას, რომ მოსახლეობისთვის უმძიმესი ტვირთი გახდა ჭარბვალიანობა. ასევე ვხედავ, რომ მიმდინარე წლის განმავლობაში ჭარბვალიანობასთან ბრძოლა განსაკუთრებით აქტუალური გახდა. გადაიდგა რამდენიმე ნაბიჯი. ახალმა პრემიერ-მინისტრმა დამტკიცებისთანავე განაცხადა, რომ მისი ერთადერთი პრიორიტეტი იქნებოდა ამ საკითხის მოგვარება. იმ ეტაპზე რთული ან შეუძლებელი იქნებოდა იმის თქმა, რა საშუალებებით მოხდებოდა ეს. ეს საშუალება ახლა გაჩნდა "ქართუ“ ფონდის მიერ და ამაზე უარის თქმა, იმის გამო, რომ ეს შეიძლებოდა შეფასებულიყო მოსყიდვად, არასწორია," - განაცხადა სერგეენკომ.

მინისტრმა საუბრისას აღნიშნა, რომ როგორც კი ეს შესაძლებლობა გაჩნდა, მაშინვე საამისოდ გეგმა გაიწერა.

„როდის გამოხატა კონკრეტულად, ქრონოლოგიურად, ფონდმა "ქართუმ" ეს მზადყოფნა ჩემთვის უცნობია. უშუალოდ მოლაპარაკებებში მე არ ვყოფილვარ ჩართული, მაგრამ რამდენიმე საკვანძო თარიღი იყო: ივნისი, როდესაც მაშინ ახალმა პრემიერ-მინისტრმა დაანონსა, რომ ეს ნაბიჯები გადაიდგმებოდა. სექტემბერი, როდესაც ასევე გამწვავდა ამაზე მსჯელობა და ბოლო თვეები, როდესაც მთავრობა, ეკონომიკური გუნდი მუშაობდა ამ მოლაპარაკებებზე", - აღნიშნა სერგეენკომ.

როგორც ცნობილია, მთავრობის გადაწყვეტილებით, ე.წ. „შავ სიაში“ მოხვედრილ 600 000-ზე მეტ მოქალაქეს საბანკო დავალიანება გაუნულდება.