რომან კაკულიას ვარაუდით, „ქართუმ“ სასესხო დავალიანებებში იმაზე ნაკლები გადაიხადა, ვიდრე მისი ჯამური ოდენობა - მილიარდნახევარი ლარია

გამორიცხული არ არის, ფონდ „ქართუსა“ და საფინანსო ინსტიტუტებს შორის ისეთი ტიპის მოლაპარაკება შედგა, რომლითაც ყველა მხარე მოგებული დარჩება, - ამის შესახებ დარგობრივი ეკონომიკისა და ეკონომიკური პოლიტიკის კომიტეტის თავმჯდომარე რომან კაკულიამ „ინტერპრესნიუსს“, 600 000 მოქალაქისთვის სასესხო დავალიანების ჩამოწერის საკითხზე კომენტირებისას განუცხადა.

როგორც კაკულია აცხადებს, საფინანსო ინსტიტუტის პორტფელის შესყიდვისას, თითოეულ პორტფელში დაფიქსირებული თანხის ავტომატურ რეჟიმში შესყიდვა არ ხდება. შესაბამისად, არ უნდა იქნას გაგებული ისე, რომ ფონდ „ქართუს“ ავტომატურად მილიარდნახევარი ლარის გადახდა უწევს, რაც სასესხო დავალიანების ჯამურ ოდენობას შეადგენს.

„უშუალოდ მოლაპარაკებაში ჩართული არ ვყოფილვარ და ამის საჭიროებას არც ვხედავ. მე ვიცოდი, რომ ეს მოლაპარაკებები მიმდინარეობდა. თემა ვიცოდი, მიზანი და ყველაფერს ვეთანხმები. თუმცა თითოეული საფინანსო ინსტიტუტის პორტფელი, რომლის შესყიდვაც მოხდება, იმას არ ნიშნავს, რომ თითოეულ პორტფელში დაფიქსირებული თანხის ავტომატურ რეჟიმში შესყიდვა უნდა მოხდეს. თუ პირობითად ავიღებთ 100 მსესხებელს, რომელზეც ფინანსურ ინსტიტუტს გაცემული აქვს კრედიტები, მათგან ამავე ინსტიტუტს შეფასებული აქვს, რომ სესხის დაბრუნების შანსი აქვს 100%, ვიღაცას 50% და ა.შ. ამ მოლაპარაკებებში შენთვის მისაღები პირობა შეიძლება იყოს, რომ გარანტირებულად მიიღო 30 მსესხებელთან დაკავშირებული თანხა და ამის სანაცვლოდ უარი თქვა დანარჩენ 70-ზე. მე არ გამოვრიცხავ ასეთი ტიპის მოლაპარაკებას, რომლითაც ორივე მხარე მოგებული იქნება და რაც მთავარია, საბოლოო ჯამში, მოგებული იქნება ის 600 ათასი ბენეფიციარი, რომელზეც არის გათვლილი ეს გადაწყვეტილება. უშუალოდ მოლაპარაკების დეტალები, სავარაუდოდ, კომერციულ საიდუმლოებად დარჩება, მაგრამ არც ველი, რომ რადგან პორტფელი მთლიანობაში მილიარდ 500 ათასად შეფასდა, ეს თანხა უნდა დაფიქსირდეს საბოლოო ჯამში, როგორც ჯამი გარიგებებისა. ეს არც არის საჭირო რომ მოხდეს. კომერციული მოლაპარაკებები იმას ნიშნავს, რომ ორივე მხარისთვის მისაღები გადაწყვეტილება იქნას მიღებული“, - განაცხადა რომან კაკულიამ.

დეპუტატი მიიჩნევს, რომ „მოლაპარაკებებისას გაცილებით ნაკლებ თანხაზე იქნებოდა საუბარი“.

„აქ არავითარ მაქინაციაზე არ არის საუბარი. აქ უბრალოდ კომერციულ მიზანშეწონილობაზე იქნება საუბარი და ჩემი აზრით, ეს არ იქნება გათანაბრებული გაჟღერებულ მთლიან თანხასთან“, - აღნიშნა კაკულიამ.

რაც შეეხება ოპოზიციის განცხადებას იმასთან დაკავშირებით, რომ არჩევნების შემდეგ აღნიშნული დაპირება დაპირებად დარჩება, კაკულია ამბობს, რომ ეს თავად ხელისუფლებას არ აწყობს.

„ჩემი აზრით ამ დაპირების შესრულების გარანტია არის შემდეგი - არათუ ამ ტიპის დაპირება, არამედ სხვა უფრო მნიშვნელოვანი და სერიოზული დაპირებები უნდა გაიცეს და არა მხოლოდ უნდა გაიცეს, არამედ უნდა შესრულდეს იმისთვის, რომ ჩვენმა გუნდმა დაიბრუნოს ის ნდობის ხარისხი, რომელიც ნამდვილად დაკარგა. ეს გამოაჩინა პირველმა ტურმა და დასაბრუნებელია მეორე ტურისთვის. ჩვენს ინტერესებში არ შედის ასეთი ტიპის გადაწყვეტილებების ვერ შესრულება, რადგან თუ ამას ვერ შევასრულებთ, მაშინ გავანულებთ იმედს იმასთან დაკავშირებით, რომ სხვა უფრო მნიშვნელოვანი ხარისხის ცვლილებების განხორციელებას შევძლებთ მომავალში“, - აღნიშნა უმრავლესობის დეპუტატმა.

საქართველოს მთავრობის გადაწყვეტილებით, ე.წ. „შავ სიაში“ მოხვედრილ 600 000-ზე მეტ მოქალაქეს საბანკო დავალიანება გაუნულდება.

როგორც პრემიერ-მინისტრმა განმარტა, საუბარია ჯამში მილიარდნახევარი ლარის განულებაზე.

„შავ სიაში“ დაფიქსირებული ვალების თითქმის 95 % შედგება სესხებიდან, რომელთა ძირი თანხაც არ აღემატება 2000 ლარს. საუბარია 600 000-ზე მეტი მოქალაქის ფინანსურ ვალდებულებებზე ბანკების, ონლაინ ორგანიზაციების თუ სხვადასხვა საფინანსო ინსტიტუტის მიმართ, რომელიც ჯამში შეადგენს დაახლოებით მილიარდნახევარ ლარს“, - განმარტა პრემიერმა.

ნანა ჩაჩუა - არჩევნების წინ არსებულ ვითარებას შევაფასებდი როგორც სიურრეალიზმს, თანაც ისეთს, როგორსაც სალვადორ დალიც კი ვერ წარმოიდგენდა
ქართული პრესის მიმოხილვა 22.10.2020
ილჰამ ალიევი იაპონურ გაზეთ Nikkei-სთან ინტერვიუში - ომის შემდეგ სომხეთს შეუძლია, აზერბაიჯანისა და თურქეთის პარტნიორი გახდეს
პარტია “ალეკო ელისაშვილი - მოქალაქეების” ერთ-ერთი ლიდერი ქეთი თურაზაშვილი - აუცილებელია განათლების სისტემის რეფორმა და “კომაროვის” მოდელი
დავით თარხან-მოურავი - ვინც კოდორი და ახალგორი ჩააბარა, ის გვაცხადებს რუსეთის აგენტად - ამაზე დაფიქრდით (R)
გოჩა თევდორაძე - სიღარიბის და უმუშევრობის დაძლევისთვის ჩვენს მოსახლეობას საოჯახო ბიზნესს შევუქმნით (R)
მერაბ ჭიქაშვილი - "პატრიოტთა ალიანსი" ერთადერთი პარტიაა, რომელსაც კანონის აღსრულება შეუძლია!" (R)
საქართველოში პირველად ჰიბრიდული B2B ფორუმი ჩატარდა
26 ოქტომბერს ავსტრია ეროვნულ დღესასწაულს განსაკუთრებული აქტივობებით აღნიშნავს
დავით თარხან-მოურავი - მოსახლეობის უმეტესობა ირჩევს "საქართველოს პატრიოტთა ალიანსს (R)
„ბადაგონმა“ თანამშრომლების უსაფრთხოებისთვის PCR ტესტირება დაიწყო
გიორგი ლომია - "ოცნება" და "ნაცმოძრაობა" იმდენად შეერწყნენ ერთმანეთს, რომ დღეს უკვე ერთნი არიან" (R)
პაატა ჯიბლაძე - "პატრიოტთა ალიანსი" ერთადერთი ძალაა, რომელიც ყოველთვის ქვეყნის ინტერესებიდან გამომდინარე მოქმედებს (R)
ნანა დევდარიანი - "პატრიოტთა ალიანსი" უსწრებს "ქართულ ოცნებას" (R)