„ევროპული საქართველოს“ ლიდერი გიგი უგულავა ოზურგეთში მოსახლეობას შეხვდა. „მძიმე სოციალური და ეკონომიკური ფონი, მოუგვარებელი ინფრასტრუქტურული საკითხები, კორუფცია და ნეპოტიზმი“ - ეს იყო მთავარი პრობლემები, რომელიც „ევროპული საქართველოს“ ერთ-ერთმა ლიდერმა გიგი უგულავამ ოზურგეთში, სერი ანასეულის, ექადიას ოლქში საკრებულოს მაჟორიტარი დეპუტატობის კანდიდატთან ერთად ადგილობრივებისგან მოისმინა.
როგორც „ინტერპრესნიუსს“ „ევროპული საქართველოდან“ აცნობეს, ადგილობრივებს შუალედური არჩევნების კანდიდატი კობა ზაქარეიშვილი გიგი უგულავამ აკაკი ბობოხიძესთან ერთად წარუდგინა. „ევროპული საქართველოს“ ერთ-ერთი ლიდერის განცხადებით, ქვეყანაში ცვლილებების დრო მოვიდა და თითოეული არჩევნები ივანიშვილის სახლში მშვიდობიანად გასტუმრებისთვის უნდა იქნას გამოყენებული. „ხალხს ყელში ამოუვიდა „ქართული ოცნება“ და ბიძინა ივანიშვილი, რომელიც მეშვიდე წელს ისევ სერიალების გადაღებას გვპირდება. ამიტომ ქართული საზოგადოება და განსაკუთრებით უპატრონოდ დატოვებული რეგიონები და რაიონები ემზადებიან პირდაპირი მნიშვნელობით, რომ დასაჯონ „ქართული ოცნება“ და დასაჯონ ბიძინა ივანიშვილი აი ამ სიცრუისთვის, აი ამ „გადაგდებულობისთვის“, ამ უპატრონობისთვის, რაც განსაკუთრებით დასავლეთ საქართველოში და გურიაში ხდება“ ,-განაცხადა გიგი უგულავა.