ცესკოს სპიკერის, ანა მიქელაძის ინფორმაციით, ამ დროისთვის, ყველა საოლქო საარჩევნო კომისიაში, ჯამში, 116 საჩივარია შესული.

როგორც მიქელაძემ ცესკო-ში გამართულ ბრიფინგზე განაცხადა, საჩივრების უმრავლესობა ტექნიკური ხასიათის დარღვევებს ეხება, ხოლო 10 საჩივრით მოთხოვნილია საუბნო შემაჯამებელი ოქმების ბათილობა.

„ჯამში საოლქო საარჩევნო კომისიებში ამ დროისთვის შესულია 116 საჩივარი. აქედან 33 საჩივარია შესული მარნეულში, ზესტაფონში -10, ხულოში - 21, ზუგდიდში 48, ოზურგეთში - 1, ხოლო თბილისში - 3. საჩივრების უმეტესი ნაწილი ეხება მხოლოდ პროცედურულ ხარვეზებს და ძირითადი მოთხოვნაა კომისიის წევრებისათვის დისციპლინარული ზომის დაკისრება. თუმცა, საოლქო საარჩევნო კომისიებში ასევე შესულია 10 საჩივარი, რომლებითაც 8 საარჩევნო უბანზე მოთხოვნილია საუბნო შემაჯამებელი ოქმების ბათილობა. მათგან 4 საჩივარია შესული მარნეულში, 5- ზესტაფონში და 1 - თბილისის #1 მაჟორიტარულ ოლქში. ამ ეტაპზე მიმდინარეობს კანონით განსაზღვრული პროცედურები. საოლქო საარჩევნო კომისიები განიხილავენ თითოეულ საჩივარს კანონის პროცედურების დაცვით და მიიღებენ შესაბამის გადაწყვეტილებას“, - განაცხადა მიქელაძემ.

იხილეთ ვიდეო: ცესკო - საოლქო საარჩევნო კომისიებში 116 საჩივარია შესული