შპს "ლილო სითის" დირექტორის მოადგილის მაყვალა კავლელაშვილის განცხადებით, "ჩაინა ლილო სითის", სადაც წუხელ ხანძარი გაჩნდა, ქონება დაზღვეული აქვს "ჯი პი აი ჰოლდინგში". მის თქმით, უკვე ესაუბრნენ „ჯი პი აი ჰოლდინგს" და დეტალურად ჩააყენეს საქმის კურსში.

კავლელაშვილის თქმით, დღეს ტერიტორიაზე ელოდებიან კომპანიის წარმომადგენელს, რომელიც სიტუაციას ადგილზე შეისწავლის.

მისივე განმარტებით, როცა სამუშაო დრო მთავრდება, ყველა თიშავს ცალკეულ ხაზს, ყველას თავის გამომრთველი აქვს.

„გარდა ამისა, ქვეკონტრაქტორებს, რომლებსაც " ჩაინა ლილო სითთან" ხელშეკრულება აქვს გაფორმებული, თავისი საქონელი დაზღვეული აქვს.ზარალის დათვლაზე საუბარი ჯერჯერობით ზედმეტია. ჩვენ ტერიტორიაზე არ შევსულვართ. საგამოძიებო მოქმედებები დაწყებულია და შესაბამის სამსახურის წარმომადგენლები ტერიტორიაზე დღეს უნდა შევიდნენ. ექსპერტებმა უნდა დაათვალიერონ, რა მდგომარეობაა და რა არის ხანძრის გამომწვევი მიზეზი",- განაცხადა კავლელაშვილმა.

ლილოში, ე.წ. ჩინურ ბაზრობაზე ხანძარი გუშინ გაჩნდა. ხანძრის შედეგად დამწვარია, დაახლოებით 1 000 კვ.მ. ფართობი და პროდუქციის ნაწილი. ადგილზე 17 სახანძრო და 2 სამაშველო ბრიგადა მუშაობდა.