გიორგი გახარია ხორავას ქუჩაზე მოზარდების მკვლელობის საქმეზე - არანაირი პრობლემა სამოხელეო დანაშაულის მოკვლევასთან, გამოძიებასთან არ გვაქვს
ხორავას საქმესთან დაკავშირებით როცა სამართლებრივი სტანდარტი შეიქმნა, მაშინ ვიმოქმედეთ ჩვენ. ზუსტად ასე იქნება სამოხელეო დანაშაულთან მიმართებაშიც. ყველაფერს გავაკეთებთ იმისთვის, რომ თუ რაიმე კითხვები დარჩება, ამ კითხვებს პასუხი გაეცეს,- ამის შესახებ შს მინისტრმა გიორგი გახარიამ, ხორავას ქუჩაზე მოზარდების მკვლელობის საქმეზე შესაძლო სამოხელეო დანაშაულთან დაკავშირებული კითხვის პასუხად განაცხადა.
მინისტრის თქმით, არანაირი პრობლემა არ არსებობს შესაძლო სამოხელეო დანაშაულის მოკვლევასთან დაკავშირებით.
„დღეს მე ამ საქმესთან დაკავშირებით გავაკეთებ მხოლოდ ერთ კომენტარს. შს სამინისტრო, ისევე როგორც სხვა ძალოვანი სტრუქტურები ყოველთვის ვამბობდით, რომ ჩვენ არანაირი პრობლემა ასეთი სახის სამოხელეო დანაშაულის მოკვლევასთან, გამოძიებასთან არ გვაქვს. რა თქმა უნდა, ისევე, როგორც არ გვქონდა პრობლემა საგამოძიებო კომისიის შექმნასთან და მის წინაშე წარდგომასთან დაკავშირებით. ჩვენს ინტერესებშია, რომ ამ უმძიმეს საქმესთან დაკავშირებით ყველა კითხვის ნიშანს დაესვას წერტილი და გაეცეს საბოლოო პასუხი. როგორც გპირდებოდით, ჩვენ ნაბიჯ-ნაბიჯ, ოღონდ ისე არა, ვიღაცას რომ მოუნდება, ემოციურად და პოლიტიკური კონტექსტით გააცხადებს საქვეყნოდ, რომ ეს ადამიანი დასაკავებელია ან ეს ადამიანი გასაშვებია. როცა სამართლებრივი სტანდარტი შეიქმნა, მაშინ ვიმოქმედეთ ჩვენ. ზუსტად ასე იქნება სამოხელეოსთან მიმართებაშიც. ჩვენ ყველაფერს გავაკეთებთ იმისთვის, რომ თუკი რაიმე კითხვები დარჩება, ამ კითხვებს პასუხი გაეცეს“,- განაცხადა გახარიამ.
