ერთი რამ ვიცი, ეს მართლა პათოლოგია იყო. რა კომენტარი უნდა გააკეთო ამ სიმახინჯეზე, არ ვიცი, - ასე გამოეხმაურა ფინანსთა მინისტრი ივანე მაჭავარიანი „რუსთავი 2“- ის წამყვანის, გიორგი გაბუნიას მიერ რუსეთის პრეზიდენტისთვის უხამსი სიტყვებით მიმართვას.

ამასთან, როგორც მინისტრმა ჟურნალისტებთან განაცხადა, ყველას აქვს უფლება, რომ აღნიშნული ფაქტის დაგმობა მოიწონოს, მათ შორის რუსეთის საგარეო საქმეთა სამინისტრომაც.

„ყველას აქვს უფლება, დაწყებული პრეზიდენტით, დამთავრებული ჩვეულებრივი ადამიანით, რომ აღშფოთდეს და რამე ნეგატიურია ამაში?

ზოგადად, მგონია, ყველა ნორმალურმა ადამიანმა ამ სიმახინჯისა და პათოლოგიის კრიტიკა და დაგმობა უნდა მოიწონოს, მათ შორის სულ ყველამ, რუსეთის, ნორვეგიისაც და ბრაზილიის საგარეო საქმეთა სამინისტრომაც. ნორმალურმა ადამიანმა უნდა თქვას, რომ ეს არის სიმახინჯე და ეს არის დაუშვებელი“, - განაცხადა ივანე მაჭავარიანმა.

7 ივლისს, „რუსთავი 2“-ის საავტორო გადაცემაში „პოსტსკრიპტუმის“ წამყვანმა გიორგი გაბუნიამ რუსეთის პრეზიდენტის ვლადიმერ პუტინის მისამართით უცენზურო განცხადებები გააკეთა. ვლადიმერ პუტინს გიორგი გაბუნიამ პირდაპირ ეთერში აგინა. გადაცემის დასრულების შემდგომ, სპეციალური გამოშვებით გავიდა ეთერში „კვირის აქცენტები“, სადაც წამყვანებმა ნიკა გვარამიამ და ეკა კვესიტაძემ გიორგი გაბუნიას განცხადების გამო ბოდიში მოიხადეს. მოგვიანებით, „რუსთავი 2“-ის შენობასთან აქცია გაიმართა. პროტესტის მონაწილეები მოითხოვდნენ დაწყებულიყო გამოძიება გიორგი გაბუნიას განცხადებაზე, ასევე, ნიკა გვარამიას და გიორგი გაბუნიას დაეტოვებინა არხი. მოგვიანებით, ტელეკომპანიის გენერალურმა დირექტორმა ნიკა გვარამიამ საგანგებო განცხადება გააკეთა და განაცხადა, რომ არხი მაუწყებლობას წყვეტს, რადგან იმ ჟურნალისტების უსაფრთხოება, რომლებიც აღნიშნულ აქციაზე მუშაობდნენ, არ იყო დაცული. „რუსთავი 2“-მა მაუწყებლობა დილიდან განაახლა.