თეოლოგი ბექა მინდიაშვილი - საპატრიარქო სინოდის უკლებლივ მთელმა შემადგენლობამ უნდა დატოვოს

თეოლოგ ბექა მინდიაშვილის განცხადებით, საპატრიარქო, მეუფე პეტრესთან ერთად, სინოდის უკლებლივ მთელმა შემადგენლობამ უნდა დატოვოს, მათ შორის, პატრიარქმაც.

როგორც „ინტერპრესნიუსს“ მინდიაშვილმა განუცხადა, მათ ეკლესია კოლაფსამდე და უფსკრულამდე მიიყვანეს.

„ჩემი დამოკიდებულება არის ის, რომ არსებული შემადგენლობით, მთელი სინოდი, უკლებლივ ყველა მღვდელმთავარი, ვალდებულია ბოლომდე გააცნობიეროს საკუთარი პასუხისმგებლობა შექმნილ ვითარებაში. კოლაფსის წინაშე დგას მთელი საპატრიარქო, ეკლესიის ადმინისტრაცია. მათ უნდა გააცნობიერონ, რომ ამ ფორმით ვეღარ მართავენ ეკლესიას, აღარ იმსახურებენ მრევლის ნდობას და უნდა წავიდნენ თავ -თავიანთ მონასტრებში. ეს არის ამ სიტუაციიდან გამოსავალი. ჩვენ დავინახეთ, რომ წლების განმავლობაში, ამ ფორმით ეკლესიის მართვამ მიიყვანა ერთი მხრივ საპატრიარქო, ეკლესიის ადმინისტრაცია, კოლაფსამდე და მეორე მხრივ, უზარმაზარი დარტყმა მიაყენა ქართულ სახელმწიფოებრიობას, რამდენადაც მისცა ხელისუფლებას ეკლესიის შიდა საქმეებში ადმინისტრაციული ჩარევის უფლება, რაც ამოვიკითხეთ იაკობის მონათხრობიდან. უნდა დატოვოს ყველამ საპატრიარქო, ყველას ვგულისხმობ და პირველ რიგში პატრიარქს. თვითონაა პასუხისმგებელი, რა თქმა უნდა. ეს არ არის ერთი დღის საქმე. ეს არის ჩემი სურვილი, თუმცა, სამწუხაროდ ამას ახდენა არ უწერია. ყველაზე რეალური გამოსავალი ეს იქნებოდა. ისინი ვერ მართავენ ეკლესიას და უფსკრულის წინ დააყენეს, ერთი ნაბიჯია უფსკრულამდე თუ უკვე უფსკრულში არ არის გადაჩეხილი, ეკლესიის ადმინისტრაცია - საპატრიარქო“, - განაცხადა მინდიაშვილმა.

მისივე თქმით, აქ მთავარია, მღვდელმთავრებმა გააცნობიერონ საკუთარი პასუხისმგებლობა ეკლესიაში შექმნილ უმწვავეს კრიზისზე.

გარდა ამისა, „ინტერპრესნიუსთან“ თეოლოგმა ასევე ისაუბრა, წმინდა სინოდის გადაწყვეტილებაზე, რომლის მიხედვითაც ის იშუამდგომლებს პრეზიდენტთან დეკანოზის გასათავისუფლებლად.

მინდიაშვილის თქმით, არ არის გამორიცხული, რომ საპატრიარქომ მამალაძის ოჯახის შანტაჟს წერილის არსებობასთან დაკავშირებით, პასუხი ამ ფორმით გასცა.

„ორი წელია გვესმის დეკანოზისგან და მისი დამცველი პირებისგან, ასევე ოჯახის წევრებისგან, რომ არსებობს რაღაც წერილი. ეს ჰგავს შანტაჟს და არ არის გამორიცხული, მართლაც ესე მოხდა, ამ შანტაჟს ამ ტიპის პასუხი გასცეს, რომ აღარ მიეცეს მსვლელობა “, - განაცხადა მინდიაშვილმა.