საინტერესოა, როგორ შეძლებს საქართველოს მთავრობა ვითარების დაბალანსებას. ცხადია, საქართველოს ორი ღრმაწყლოვანი პორტი არ სჭირდება, - ამის შესახებ „ინტერპრესნიუსს“„ანაკლიის განვითარების კონსორციუმის“ გენერალურმა დირექტორმა, ლევან ახვლედიანმა „ეიპიემ ტერმინალს ფოთის“ განცხადებასთან დაკავშირებით განუცხადა, რომლის თანახმადაც, კომპანია იმედოვნებს, რომ ფოთში ახალი ღრმაწყლოვანი პორტის ასაშენებლად საჭირო ყველა ნებართვას დროულად მიიღებს.

„ვფიქრობ, ძალიან საინტერესო პოზიციაში აღმოჩნდა ხელისუფლება. ერთი მხრივ, იძახის, რომ აცხადებენ ტენდერს ანაკლიის პორტის ასაშენებლად, მეორე მხრივ ახალი ღრმაწყლოვანი პორტის მშენებლობაზე საუბრობს „ეიპიემ ტერმინალს ფოთი“. ძალიან მაინტერესებს, როგორ შეძლებს მთავრობა ამ ვითარების დაბალანსებას იმიტომ, რომ ცხადია, საქართველოს ორი ღრმაწყლოვანი პორტი არ სჭირდება“, - აცხადებს ლევან ახვლედიანი.

მისივე შეფასებით, მთავრობის ქმედებებიდან და პოზიციიდან გამომდინარე, კიდევ ერთხელ გამოჩნდება რეალური განწყობა ანაკლიის პორტის პროექტის მიმართ.

შეგახსენებთ, რომ „ეიპიემ ტერმინალს ფოთმა” 28 იანვარს განცხადება გაავრცელა, რომელშიც აღნიშნულია, რომ „ეიპიემ ტერმინალს ფოთი“ აგრძელებს ღრმაწყლოვანი პორტის მშენებლობის პროექტზე აქტიურ მუშაობას.