15 წლის ლუკა სირაძის გარდაცვალების საქმეზე დაკავებული მარიანა ჩოლოიანის საქმეზე წინასასამართლო სხდომა დაიხურა.

აღნიშნული შუამდგომლობა ბრალდების მხარემ დააყენა. საქმის პროკურორის, ლევან ქუთათელაძის განცხადებით, სასამართლოს მიმდინარეობისას გაჟღერებული იქნება ისეთი ინფორმაცია, რომელიც არასრულწლოვანთა პერსონალურ მონაცემებს შეეხება, რის გამოც სხდომა დახურულ რეჟიმში უნდა წარიმართოს.

პროცესის დახურვის შუამდგომლობას დაეთანხმნენ მარიანა ჩოლოიანის ადვოკატებიც.

ბრალდების მხარის შუამდგომლობა მოსამართლე ლელა კალიჩენკომ დააკმაყოფილა.

ბრალდებული გამომძიებლის ინტერესებს სასამართლოში 5 ადვოკატი იცავს.

ცნობისთვის, 15 წლის მოზარდი ლუკა სირაძე, რომელმაც პოლიციაში გამოკითხვის შემდეგ თვითმკვლელობა სცადა, 17 დეკემბერს საავადმყოფოში გარდაიცვალა. აღნიშნულთან დაკავშირებით, სამართალდამცავებმა გამომძიებელი მარიანა ჩოლოიანი დააკავეს. მას თბილისის საქალაქო სასამართლომ აღკვეთის ღონისძიების სახით პატიმრობა 19 დეკემბერს შეუფარდა.