მიხეილ ჩხენკელმა იტალიის ელჩთან ახალი საგანმანათლებლო პროექტები განიხილა

საქართველოს განათლების, მეცნიერების, კულტურისა და სპორტის მინისტრმა, მიხეილ ჩხენკელმა, იტალიის საგანგებო და სრულუფლებიან ახალ ელჩთან საქართველოში, ენრიკო ვალვოსთან, გაცნობითი ხასიათის შეხვედრა გამართა. როგორც „ინტერპრესნიუსს“ სამინისტროს პრესსამსახურიდან აცნობეს, მხარეებმა საქართველოსა და იტალიას შორის თანამშრომლობის საკითხები განიხილეს.

მინისტრმა ენრიკო ვალვოს მადლობა გადაუხადა ყველა იმ ერთობლივი პროექტისთვის, რომელსაც იტალიის მხარე განათლების ყველა საფეხურზე ახორციელებს, მათ შორის, სტუდენტებისთვის, აკადემიური და ადმინისტრაციული პერსონალისათვის მრავალფეროვანი გაცვლითი პროგრამების შეთავაზებისათვის.

შეხვედრაზე საუბარი შეეხო ქუთაისის საერთაშორისო უნივერსიტეტის უნიკალურ პროექტს და მისი განვითარების სამომავლო პერსპექტივებს, რომლის დასაარსებლად ბიძინა ივანიშვილმა და მისმა ოჯახმა 1 მილიარდი ევროს ღირებულების ინვესტიცია განახორციელა. როგორც მიხეილ ჩხენკელმა აღნიშნა, ამ ეტაპზე ქუთაისის საერთაშორისო უნივერსიტეტი აქტიურად თანამშრომლობს მსოფლიოს წამყვან უნივერსიტეტებთან და კვლევით ცენტრებთან და მიესალმება იტალიის წამყვან უნივერსიტეტებთან ერთობლივი პროგრამების განხორციელებას.

თავის მხრივ, ენრიკო ვალვომ მზადყოფნა გამოხატა, ამ მიმართულებით აქტიურად ითანამშრომლოს ქუთაისის საერთაშორისო უნივერსიტეტთან.

მიხეილ ჩხენკელმა იტალიის ელჩს იმის შესახებაც მიაწოდა ინფორმაცია, რომ უნივერსიტეტის ბაზაზე შეიქმნება ადრონული თერაპიის ცენტრი, სადაც ონკოლოგიური დაავადებების მკურნალობასთან ერთად განხორციელდება თანამედროვე კვლევები სამედიცინო და ბირთვულ ფიზიკაში. მნიშვნელოვანია ისიც, რომ უნივერსიტეტის აკადემიურ და კვლევით პროცესში აქტიურად ჩაერთვება და სამეთვალყურეო საბჭოს წევრი გახდება პროფესორი რობერტო ორეკია (Roberto Orecchia), რომელიც მილანში მდებარე ევროპული ონკოლოგიური ინსტიტუტის სამეცნიერო დირექტორია. შეხვედრაზე საუბარი შეეხო კულტურის მიმართულებით საგამოფენო პროექტებსაც, რომლებიც საქართველოს ეროვნულ მუზეუმთან თანამშრომლობით ხორციელდება. მინისტრის თქმით, ამგვარი პროექტები მომავალშიც გაგრძელდება და მნიშვნელოვანი იქნება საგანმანათლებლო კომპონენტის გაძლიერება, რომელშიც საჯარო სკოლის მოსწავლეები და უმაღლესი სასწავლებლების სტუდენტებიც ჩაერთვებიან. ჯანსაღი ცხოვრების პოპულარიზაციისა და ორი ქვეყნის ახალგაზრდების ურთიერთობების გაღრმავების მიზნით მხარეებმა სპორტის მიმართულებით თანამშრომლობის ახალი პერსპექტივები განიხილეს“,-ნათქვამია ინფორმაციაში.

ზაალ ანჯაფარიძე - შესაძლოა, დასავლეთს არ ეპიტნავებოდეს „ქართული ოცნება,“ მაგრამ მან დაამტკიცა, რომ შეუძლია პარტნიორობაც და სტაბილურობის უზრუნველყოფაც, რაც დასავლეთისთვის პრიორიტეტულია
“ნიუმედის”ლაბორატორიული განყოფილების ხელმძღვანელი - ჩვენ კლინიკაში ახალ ბენეფიციარებს კოვიდ 19-ის სწრაფი ტესტი უფასოდ უტარდებათ
ქართული პრესის მიმოხილვა 25.11.2020
ჰუბერტ ქნირში - პარტიებს სულ უფრო ნაკლებად შეუძლიათ ერთმანეთთან საუბარი და ამ განვითარებაში  სხვადასხვა პიროვნებას სხვადასხვა წვლილი მიუძღვის
რატომ არის მნიშვნელოვანი ცემენტის ხარისხის კონტროლი სეისმურად აქტიურ ზონაში
"სილქ როუდ ჯგუფის" განცხადება "საქანელას" პროექტის შესახებ