მარიანა ჩოლოიანის ადვოკატის განცხადებით, დღეს დაკითხული ბრალდების მხარის მოწმეების ჩვენებები ჩოლოიანის უდანაშაულობას ადასტურებს

15 წლის ლუკა სირაძის გარდაცვალების საქმეზე დაკავებული გამომძიებლის, მარიანა ჩოლოიანის ადვოკატის, გაგი მოსიაშვილის განცხადებით, დღეს დაკითხული ბრალდების მხარის მოწმეების ჩვენებები ჩოლოიანის უდანაშაულობას ადასტურებს.

როგორც ადვოკატმა ჟურნალისტებს პროცესის დასრულების შემდეგ განუცხადა, მოწმეთა მიერ სასამართლოსთვის მიწოდებული ინფორმაცია არა ბრალდების მხარეს, არამედ დაცვის მხარეს გამოადგება.

„ბრალდების მოწმეები დაიკითხნენ დღევანდელ პროცესზე, თუმცა მინდა გითხრათ, რომ ბრალდების მოწმეებმა სასამართლოს მიაწოდეს ის ინფორმაცია, რაც გამოადგება არა ბრალდებას, არამედ დაცვას მარიანა ჩოლოიანის უდანაშაულობის დასადასტურებლად. კერძოდ, ბრალდების მოწმეთა მიერ მიწოდებული ინფორმაცია მარიანა ჩოლოიანის უდანაშაულობას ადასტურებს, ვინაიდან დახურულია პროცესი და შინაარსობრივ მხარეში ვერ შევდივარ, ორი მთავარი სიტყვა, რაც შეიძლება ვთქვათ, გახლავთ ის, რომ ინფორმაცია, რომელიც მათ მიაწოდეს, აღნიშნულით არ დასტურდება ჩოლოიანის ბრალეულობა, სამართლებრივი შეფასება რომ გავაკეთოთ. აქედან გამომდინარე, სწორედ ამას ვიძახი, რომ საქმის არსებითი განხილვის ეტაპზე მტკიცებულებათა ერთობლიობა და მტკიცებულებათა ჯაჭვი ან უნდა დადასტურდეს, ან უარყოფილ უნდა იქნეს“, - განაცხადა ადვოკატმა.

საქმის პროკურორის, ლევან ქუთათელაძის განცხადებით, დღევანდელ პროცესზე ორი მოწმე, პოლიციის ორი თანამშრომელი დაიკითხა, რომლებიც 2019 წლის 10 დეკემბერს სამსახურში იმყოფებოდნენ და სამსახურებრივ მოვალეობას ასრულებდნენ. მისი თქმით, ეს ორი პირი ლუკა სირაძის გამოკითხვის პროცესს არ დასწრებია.

„სხდომები დახურულია და კონკრეტული ინფორმაციის მოწოდებისგან თავს შევიკავებ. პოლიციის თანამშრომლები გამოიკითხნენ საგამოძიებო უწყების თანამშრომლების მიერ, საუბარია სახელმწიფო ინსპექტორის სამსახურზე. არც ერთი და არც მეორე პირი არ დასწრებია უშუალოდ ლუკა სირაძის გამოკითხვის პროცესს. შესაბამისად, ისინი სასამართლოში დაიკითხნენ იმ სხვა კონკრეტული გარემოებების დადგენის მიზნით, რომელიც ასახულია ასევე ბრალდების შესახებ დადგენილებაში, რომელიც მარიანა ჩოლოიანს წარედგინა”, - აღნიშნა პროკურორმა.

ცნობისთვის, 15 წლის მოზარდი ლუკა სირაძე, რომელმაც პოლიციაში გამოკითხვის შემდეგ თვითმკვლელობა სცადა, 17 დეკემბერს საავადმყოფოში გარდაიცვალა. აღნიშნულთან დაკავშირებით, სამართალდამცავებმა გამომძიებელი მარიანა ჩოლოიანი დააკავეს. მას თბილისის საქალაქო სასამართლომ აღკვეთის ღონისძიების სახით პატიმრობა 19 დეკემბერს შეუფარდა.

ტოომას ჰენდრიკ ილვესი - არ გჭირდებათ ევროკავშირის დროშების ყველგან აღმართვა, თუ მის ღირებულებებს არ იზიარებთ - სიტყვების თქმით: ”ჩვენ ევროპელები ვართ“, ევროკავშირში ავტომატურად ვერ შეხვალთ
ქართული პრესის მიმოხილვა 09.04.2021
ლევან დოლიძე - რაც უფრო დიდხანს გაგრძელდება ვაშინგტონსა და ბრიუსელში ჩვენს შიდა პრობლემებზე მსჯელობა, მით უფრო გაგვიჭირდება მათთან იმ საკითხებზე საუბარი, რასაც ქვეყნის ინტერესები მოითხოვს
ბექა ნაცვლიშვილი - როგორც ჩანს, "ქართული ოცნება“ ემზადება მოლაპარაკების მესამე რაუნდისთვის და აგრძელებს კომუნიკაციას ევროკავშირთან, ამის შედეგი კი იქნება ის, თუ რა მოხდება მელიას გადადებულ სასამართლოზე
კახა ოქრიაშვილი - 15 მაისის აქციის სამზადისში აქტიურად ვარ ჩართული
ხარისხი გარანტირებულია: "კარფური" „მასტერშეფის“ ახალი სეზონის გენერალური სპონსორი და მხარდამჭერი გახდა