ამირან გამყრელიძის განცხადებით, დღეს დადასტურებული 14 ახალი შემთხვევიდან მესტიის სოფელ ლენჯერს მხოლოდ ერთი უკავშირდება
დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორის ამირან გამყრელიძის განცხადებით, დადასტურებული 14 ახალი შემთხვევიდან მესტიის მუნიციპალიტეტის სოფელ ლენჯერს მხოლოდ ერთი უკავშირდება. გამყრელიძის თქმით, ბოლო 2 დღის განმავლობაში, ჯამში, ლენჯერს კორონავირუსის 17 დადასტურებული შემთხვევა უკავშირდება. მისივე თქმით, ჯერ არ დასრულებულა გუშინ აღებული 400-მდე ნიმუშის კვლევა.
„მთლიანად დღეს დილით იყო 14 ახალი შემთხვევა. ამ 14-დან სოფელ ლენჯერთან ანუ სვანეთის სოფელში, რომელთანაც ახალი კლასტერის შექმნაა დაკავშირებული, იყო მხოლოდ 1 შემთხვევა ანუ სულ ამჟამად ლენჯერიდან გვაქვს 17 შემთხვევა, საიდანაც 12 თვითონ სვანეთში მცხოვრებ ადამიანებს დაუდასტურდათ და 5 - მათ კონტაქტებს - თბილისში. მაგრამ ჯერ არ დასრულებულა გუშინ აღებული 400-მდე ნიმუშის კვლევა, რომლებიც მოგეხსენებათ, რომ დილას გამთენიისას ჩამოვიდა, რადგან იქ მეწყერმა გზა გადაკეტა და ვერ მოხერხდა ნიმუშების ჩამოტანა ადრე, ალბათ, 3 საათის შემდეგ იქნება მათი პასუხები. ეს არის დაახლოებით 400-მდე კვლევა, რომელთა დიდი ნაწილი ქუთაისში ტარდება და ასევე ნაწილი ზუგდიდში გაკეთდება. გუშინ იქ მუშაობდა 5 ბრიგადა, დღეს დაემატა კიდევ და ჯამში არის - 14, თუ არ ვცდები. დამატებით დღეს მიმდინარეობს კვლევები და როგორც მითხრეს, 1000-მდე ნიმუშს დღეს კიდევ ავიღებთ და ჩამოტანილი იქნება ზუგდიდსა და ქუთაისში,“- განაცხადა ამირან გამყრელიძემ.
v-if="article.gallery" v-html="article.gallery"
