ხატია დეკანოიძე - არ ვიზიარებ პრეზიდენტის მოსაზრებას, რომ სააკაშვილის თავისუფლება შეიძლება გახდეს პოლარიზაციის საწყისი - როცა პოლიტიკური შურისძიებაა, ეს ერთ-ერთი მნიშვნელოვანი ბერკეტია
არ ვიზიარებ სალომე ზურაბიშვილის მოსაზრებას, რომ სააკაშვილის თავისუფლება შეიძლება გახდეს პოლარიზაციის საწყისი. პირიქით, როდესაც პოლიტიკური შურისძიებაა და სასამართლო არ არსებობს, ეს ერთ-ერთი მნიშვნელოვანი ბერკეტია ივანიშვილის რეჟიმის პირობებში, - ამის შესახებ „ნაციონალური მოძრაობის“ ერთ-ერთმა ლიდერმა, ხატია დეკანოიძემ „პალიტრანიუსის“ გადაცემაში „360 გრადუსი“ განაცხადა.
როგორც მან აღნიშნა, ჩამოთვლილი ბერკეტების საშუალებით ბიძინა ივანიშვილი „რეპრესიების რეჟიმში“ ამყოფებს ოპოზიციურ პარტიებს და სწორედ ამიტომ მესამე პრეზიდენტი ციხეში იმყოფება.
„ჩემი ღია მხარდაჭერა გამოვხატე იმ პროცესისა და ინიციატივების მიმართ, რომელიც წამოიწყო საქართველოს პრეზიდენტმა რამდენიმე თვის წინ. ასევე ვთქვი, რა უნდა ყოფილიყო მთავარი პლატფორმა ამ ინიციატივისთვის და ერთ-ერთი მთავარი იყო პოლიტიკურ მართლმსაჯულებაზე მორატორიუმი, რაც გულისხმობს პოლიტიკურად მოტივირებული საქმეების შეჩერებას. რეალური ნაბიჯი გულისხმობს მძიმე გარემოს შემსუბუქებას იმით, რომ რაღაც საერთო თამაშის წესებზე შევთანხმებულიყავით.
ყველას ერთად, მათ შორის პრეზიდენტს, როგორც შეთანხმების ერთ-ერთ ინიციატორს, უნდა გვესმოდეს, თუ რა უნდა გავაკეთოთ ყველამ ერთად ძალიან მძიმე ფორმულის შესაცვლელად - პოლიტიკური მართლმსაჯულების დასასრულებლად, იმის გასაცნობიერებლად, რომ პრეზიდენტები ამ სასამართლოს მიერ გასამართლებული არ უნდა იყვნენ. შესაბამისად, თუ სახელმწიფოებრივად ვუდგებით, ეს ყველაფერი უნდა გავაცნობიეროთ. ვფიქრობ, რომ შედეგიც შესაბამისი უნდა დადგეს. ვერ გეტყვით, რა შედეგი შეიძლება მოიტანოს თანხმობის ინიციატივამ, რადგან კონკრეტული ნაბიჯები, ჯერჯერობით, არ განხორციელებულა. ვერ გეტყვით რა შეიძლება ვთქვა ამ ეტაპზე, რადგან თანხმობა მესმის, როგორც რაღაც საკითხებზე საერთო ნიშნულის პოვნა. ახლა რაიმე პოზიტიურ მოლოდინებზე საუბარი ძალიან რთულია“, - განაცხადა ხატია დეკანოიძემ.
ცნობისთვის, საქართველოს პრეზიდენტმა მედიასთან შეხვედრაზე განაცხადა, რომ ყოფილი პრეზიდენტის, მიხეილ სააკაშვილის შეწყალება „ზეპოლარიზაციის და არა დეპოლარიზაციის საბაბი“ იქნება.
v-if="article.gallery" v-html="article.gallery"
