ბათუმში, მელიქიშვილის ქუჩაზე მდებარე ე.წ. რუსულ სკოლაში საგამოძიებო სამსახურის თანამშრომლები იმყოფებოდნენ, - ამის შესახებ „ინტერპრესნიუსს” თვითმხილველებმა განუცხადეს.

მათი თქმით, სასწავლო დაწესებულებაში მოზარდები იმყოფებიან და სწავლის პროცესი უწყვეტ რეჟიმში მიმდინარეობს.

სკოლის ადმინისტრაციის თანამშრომლებთან გასაუბრება მედიის წარმომადგენლებმა სცადეს, თუმცა მათ კომენტარისგან თავი შეიკავეს.

ცნობისთვის, აჭარის განათლების, კულტურისა და სპორტის მინისტრმა, მაია ხაჯიშვილმა განაცხადა, რომ ბათუმში, ე.წ. რუსული სკოლის გასახსნელად საჭირო აკრედიტაციის მისაღებად სამინისტროში და რესურსცენტრში დოკუმენტაცია შესული არ არის.

როგორც ხაჯიშვილმა ჟურნალისტებს საკითხზე კომენტირებისას განუცხადა, თუ კანონმდებლობის დარღვევა დაფიქსირდება, სამინისტრო კანონის შესაბამისად იმოქმედებს.

როგორც ცნობილია, საგამოძიებო სამსახურმა უკანონო საგანმანათლებლო საქმიანობის განხორციელების ფაქტზე გამოძიება დაიწყო.