„საქართველოს ეროვნულ დემოკრატიული ინსტიტუტის“ (NDI) კვლევის მიხედვით, გამოკითხულთა 51% მთავრობის საქმიანობას დადებითად აფასებს, 39% კი უარყოფითად.

NDI-ის კვლევის მიხედვით, გასული წლის შემდეგ, მთავრობის საქმიანობის დადებითი შეფასება 10%-ით გაიზარდა. მთავრობის საქმიანობის დადებითი შეფასება ყველაზე მეტად გადაუწყვეტელ ამომრჩეველში, პატარა ქალაქებსა და სოფლებში, ასევე საშუალო ასაკის ჯგუფებშია გაზრდილი. ამასთან, მთავრობის შეფასების დადებითი მაჩვენებელი 7%-ითაა გაზრდილი ოპოზიციის მხარდამჭერებში.

რაც შეეხება უშუალოდ პრეზიდენტის, პრემიერისა და პარლამენტის საქმიანობების შეფასებებს, პრეზიდენტის ინსტიტუტს გამოკითხულთა 14% აფასებს კარგად, 45% საშუალოდ, 32% კი ცუდად. პრემიერ-მინისტრის ინსტიტუტის საქმიანობას გამოკითხულთა 31% აფასებს კარგად, 36% საშუალოდ, 27% კი ცუდად. პარლამენტის საქმიანობას კი 12% აფასებს კარგად, 50% საშუალოდ, 31% კი ცუდად.

NDI-ის შეფასებით, პრეზიდენტის, პრემიერისა და პარლამენტის საქმიანობის უარყოფითი შეფასებები 8-10 პროცენტითაა შემცირებული.

პრემიერის საქმიანობის შეფასება შედარებით დაბალია თბილისში და ოპოზიციის მხარდამჭერებში. პრეზიდენტის საქმიანობის უარყოფითი შეფასება შედარებით დაბალია ოპოზიციის მხარდამჭერებში. პარლამენტს კი ყველაზე კრიტიკულად თბილისსა და დიდ ქალაქებში, ასევე ოპოზიციის მხარდამჭერებში აფასებენ.

ცნობისთვის, აღნიშნული ანგარიში 3 დეკემბრიდან - 20 დეკემბრამდე ქვეყნის მასშტაბით ჩატარებულ, საქართველოს ზრდასრული მოსახლეობის წარმომადგენლობით პირისპირ გამოკითხვის შედეგებს ემყარება (ოკუპირებული ტერიტორიების გამოკლებით).

დეკემბერში ჩატარებული გამოკითხვა სულ 2,519 დასრულებულ ინტერვიუს მოიცავს. საშუალო ცდომილების ზღვარი კვლევაში +/- 1,6 პროცენტია. NDI-ის კვლევა დიდი ბრიტანეთის მთავრობის UK aid-ის ფინანსური ხელშეწყობით ხორციელდება. კვლევა ჩატარებულია CRRC საქართველოს მიერ.