გიგი უგულავა - ჩვენ უფსკრულთან ვდგავართ - ჯობია იაქტიუროთ, ვიდრე ურმის გადაბრუნების შემდეგ ვიმოქმედოთ, მერე რომ გზა გამოჩნდება, ის ძალიან მძიმე იქნება

ჩვენ უფსკრულთან ვდგავართ და თუ ჩავვარდით, ვარდება ყველა - ჯობია იაქტიუროთ, ვიდრე ურმის გადაბრუნების შემდეგ ვიმოქმედოთ. მერე რომ გზა გამოჩნდება, ის გზა ძალიან მძიმე იქნება, - ამის შესახებ ოპოზიციონერმა პოლიტიკოსმა, გიგი უგულავამ მთავრობის ადმინისტრაციასთან, საქართველოს მესამე პრეზიდენტის, მიხეილ სააკაშვილის სამკურნალოდ საზღვარგარეთ გადაყვანის მოთხოვნით მიმდინარე აქციაზე განაცხადა.

მისივე თქმით, თუ გვინდა, რომ საზოგადოებად შევდგეთ, მიხეილ სააკაშვილის მკურნალობის და სიცოცხლის გადარჩენის საკითხს პირველ რიგში, ადამიანური თვალსაზრისით უნდა შევხედოთ.

„ჩვენ, როგორც სახელმწიფო, სახელმწიფოებრიობაზე ტექსტს გავდივართ და ჩვენ, როგორც საზოგადოება, გავდივართ ტესტს, თუ რამდენად ვართ საზოგადოება, ამ სიტყვის თანამედროვე გაგებით. სამწუხაროდ, ჯერჯერობით ჩვენ ამ ტესტს ვერ ვაბარეთ და ერთი და იგივე გზაზე ვტრიალებთ. ამიტომ მნიშვნელოვანია, რომ თუ გვინდა, რომ ჩვენ საზოგადოებად შევდგეთ, მიხეილ სააკაშვილის მკურნალობის და სიცოცხლის გადარჩენის საკითხს უნდა შევხედოთ, პირველ რიგში, როგორც ადამიანი. საზოგადოებად ვერ შევდგებით, თუ არ გვექნება ერთმანეთის მიმართ ემპათია. საზოგადოება იკვრება მაშინ, როდესაც ერთმანეთის მიმართ თანაგანცდა გვაქვს და ეს თანაგანცდა თუ არ არსებობს, მაშინ ყველაფერი სიძულვილით ივსება, რასაც დღეს ხელისუფლება ხელს უწყობს. ამიტომ არის დღეს ძალიან სახიფათო დღეები ჩვენი ქვეყნის სახელმწიფოებრიობისთვის, მომავლისთვის და ყველა ადამიანის მომავლისთვის“, - განაცხადა გიგი უგულავამ.