შალვა პაპუაშვილი - ჩვენ ვაკვირდებით და დავაკვირდებით, ვინ იქნება პირველი, ვინც სახალხო დამცველის მიმართ ძალადობას დაგმობს

პარლამენტის თავმჯდომარის, შალვა პაპუაშვილის განცხადებით, სამწუხაროა, რომ 7 მარტს გამართულ საპროტესტო აქციაზე ახალი სახალხო დამცველის, ლევან იოსელიანის მიმართ ძალადობის ფაქტს დღემდე არცერთი არასამთავრობო ორგანიზაცია არ გამოხმაურებია.

გარდა ამისა, როგორც შალვა პაპუაშვილმა აღნიშნა, „ქართულმა ოცნებამ“, ბოლო 10 წელიწადის განმავლობაში, ქვეყანაში მშვიდობა უზრუნველყო და ქართულმა საზოგადოებამ არაერთხელ დაამტკიცა, რომ არეულობის უფლებას არავის მისცემს.

„თუკი ადრე „ნაციონალური მოძრაობა“ სახალხო დამცველზე, ვგულისხმობ სოზარ სუბარს, სპეცრაზმელის ხელით ძალადობდა, ახლა კვლავ „ნაციონალური მოძრაობა“ აქციის მონაწილეთა ხელით ძალადობდა ახალ სახალხო დამცველზე. სამწუხაროა, რომ არცერთი არასამთავრობო ორგანიზაცია ამ ძალადობას დღემდე არ გამოხმაურებია და არ დაუგმია ეს ქმედება. ჩვენ ვაკვირდებით და დავაკვირდებით, ვინ იქნება პირველი, ვინც სახალხო დამცველის მიმართ ძალადობას დაგმობს.

ჩვენი საზოგადოება საკმაოდ მომწიფებულია იმისთვის, რომ ასეთი რადიკალიზაცია არ დაუშვას. ჩვენ როცა ვსაუბრობთ, რომ „ქართულმა ოცნებამ“ ბოლო 10 წელიწადის განმავლობაში მშვიდობა უზრუნველყო, აქ მხოლოდ გარე მშვიდობას არ ვგულისხმობთ. აქ საუბარია სამოქალაქო მშვიდობაზე. ყველას აზრი მნიშვნელოვანია და ჩვენ ვართ ღია საზოგადოება, სადაც სხვადასხვა მოსაზრებები არსებობდეს. ქართულმა საზოგადოებამ არაერთხელ დაამტკიცა, რომ არეულობის უფლებას არავის მისცემს“, - განაცხადა შალვა პაპუაშვილმა.

ამასთან, მისივე თქმით, არასამთავრობო ორგანიზაციების ლიდერები ჩართულები არიან პირდაპირ ზიზღის კამპანიაში, „რომელიც არაფერი არაა გარდა ფაშიზმისა და ბოლშევიზმისა“.

როგორც პაპუაშვილმა აღნიშნა, 7-8 მარტის მოვლენებიდან ამდენი დღე გავიდა და არასამთავრობო ორგანიზაციების მხრიდან არის ნულოვანი რეაგირება.

„ჩვენ ვხედავთ, რომ ეს არის კოორდინირებული კამპანია. ჩვენ ვხედავთ, რომ ერთის მხრივ [7-8 მარტს] იყო ახალგაზრდების ჯგუფი ჩართული, რომელიც სწორედ აგრესიით გამოირჩეოდა როგორც პოლიციელების მიმართ, ისე პარლამენტის შენობის დაზიანების მხრივ და ეს ვნახეთ პირდაპირ ეთერში. ამაზე თვალის დახუჭვა როგორ შეიძლება და მეორე, ჩვენ ვხედავთ ახლა მიმდინარე ზიზღის კამპანიას და არაერთხელ გავუსვი ამას ხაზი. ეს არის ფაშიზმი, რასაც ჩვენ ვაკვირდებით ადამიანებისგან, რომელსაც თავი მოაქვთ, თითქოს, რაღაც ადამიანის უფლებებზე და ა.შ მუშაობენ, მათ შორის არასამთავრობო ორგანიზაციების წარმომადგენლები, რომლებიც პირდაპირ არიან ჩართულები ფაშისტურ კამპანიაში ახლა, როდესაც ხდება ადამიანების გარიყვისკენ მოწოდება, მათი ჩარეცხვისკენ, მოკვეთისკენ და კეთროვანებად წარმოჩენა. ეს არის ის, რაც 100 წლის წინ ხდებოდა ზოგ ქვეყანაში. ის, რაც ასი წლის წინ საქართველოშიც მოხდა ბოლშევიკების ხელით, როდესაც პროფესორებს არ უშვებდნენ უნივერსიტეტებში. ასი წლის თავზე ამას იმეორებს ის ხალხი, რომელსაც პრეტენზია აქვს, რომ რაღაც საკითხებში არიან ჩახედულები. ამდენი დღე გავიდა და ამ ფაშისტურ კამპანიას არ წყვეტენ ის ადამიანები, რომლებიც ცდილობენ ვინც არ მოსწონთ გარიყონ. რეაგირება არასამთავრობო ორგანიზაციების მხრიდან არის ნულოვანი. ვერ ვნახე ვერცერთი განცხადება, უფლებადამცველებს, რომ ეძახიან თავს, რომელიც დაგმობდა ამ კამპანიას, გამოავლენდა მათ შორის ამ კამპანიის ავტორებს და გაემიჯნებოდა ამ კამპანიას. პირიქით, არასამთავრობო ორგანიზაციების ლიდერები ჩართულები არიან პირდაპირ ზიზღის კამპანიაში, რომელიც არაფერი არაა გარდა ფაშიზმისა და ბოლშევიზმისა“, - განაცხადა პაპუაშვილმა.

სტეპან გრიგორიანი - უახლოეს 2-3 თვეში არსებობს იმის შანსი, რომ თურქეთ-სომხეთის საზღვარი მესამე ქვეყნის მოქალაქეებისა და დიპლომატებისთვის გაიხსნას
ქართული პრესის მიმოხილვა 24.06.2024
ალექსანდრე თვალჭრელიძე - ძალიან მინდა დავიჯერო, რომ ჩინური კომპანიის შერჩევა პროექტის განსახორციელებლად უბრალოდ გაუაზრებელი ნაბიჯია და არა პოლიტიკური ტრენდის შეცვლის შემაშფოთებელი ნიშანი
კახა ოქრიაშვილი - საქართველოსთვის ევროკავშირის კანდიდატი ქვეყნის სტატუსი გაყინულია, რაც იმას ნიშნავს, რომ გაყინულია პერსპეტივა ქართველი მასწავლებლის საშუალო ხელფასი 4 500 ლარი გახდეს
კახა ოქრიაშვილი - 2016 წელს 2 მილიონი „ოცნებას“ გადავუხადე თუ პირადად ბატონ ივანიშვილს?