ჩვენი მთავარი გზავნილი იყო, რომ ხელისუფლებაზე ზეწოლა გაიზარდოს, რათა დარჩენილ დროში გადადგას ნაბიჯები, რომელიც შესაძლებლობას მისცემს პოლონეთს და სხვა მეგობრებს, მხარი დაუჭირონ ქვეყნისთვის კანდიდატის სტატუსის მინიჭებას, - ამის შესახებ „ლელოს“ პოლიტიკურმა მდივანმა სალომე სამადაშვილმა პოლონეთის საგარეო საქმეთა მინისტრთან შეხვედრის შემდეგ ჟურნალისტებს განუცხადა.

მისი თქმით, საკითხები, რომლებიც პოლონელ მინისტრთან დააყენეს, ევროკავშირის პოზიციას უკავშირდება და ასევე იმას, რა ნაბიჯები უნდა გადაიდგას საქართველოში კანდიდატის სტატუსის მიღების პროცესში.

„საკითხები, რომლებიც დავაყენეთ, უკავშირდება ევროკავშირის პოზიციას. პოლონეთი, რა თქმა უნდა, ჩვენი ქვეყნის აქტიური მხარდამჭერია. სურთ, ჩვენმა ქვეყანამ კანდიდატის სტატუსი მიიღოს. ჩვენი მთავარი გზავნილი იყო, რომ ხელისუფლებაზე ზეწოლა გაიზარდოს, რათა, დარჩენილ დროში გადადგას ნაბიჯები, რომლებიც შესაძლებლობას მისცემს პოლონეთს და სხვა მეგობრებს, მხარი დაუჭირონ ქვეყნისთვის კანდიდატის სტატუსის მინიჭებას.

სამწუხაროდ, ანომალიურ ვითარებაში ვართ. ქვეყანას ჰყავს ხელისუფლება, რომელიც ხელს უშლის ქვეყნის მომავალს, მაგრამ ჰყავს ოპოზიცია, რომელიც საკუთარი მდგომარეობიდან გამომდინარე (არც რეფორმების გატარება შეგვიძლია და არც უმრავლესობა გვაქვს), ვაკეთებ იმას, რაც შეიძლება გაკეთდეს, რომ ქვეყანამ ეს ისტორიული შანსი არ დაკარგოს“, - განაცხადა სალომე სამადაშვილმა.