უკრაინელებმა დონეცკში კიდევ ერთი სოფელი გაათავისუფლეს
უკრაინელი დამცველები დონეცკის ოლქში წინსვლას აგრძელებენ. ოდესის საზღვაო ძალების განცხადებით, კონტრშეტევის ფარგლებში დონეცკის ოლქის სოფელი სტოროჟევოე გაათავისუფლეს, რომელიც 2022 წლის მარტიდან იყო ოკუპირებული.
„დასახლების გაწმენდის შედეგად ორმოცდაათამდე „რაშისტი“ დაიღუპა, ოთხი ტყვედაა აყვანილი. დღეს სახელმწიფო დროშა ისევ ფრიალებს სტოროჟევოე და ასე იქნება ყველა დასახლებაში, სანამ არ გავათავისუფლებთ მთელ უკრაინულ მიწას“, - ნათქვამია საზღვაო ქვეითების განცხადებაში.
დასახლების დეოკუპაცია უკრაინის თავდაცვის სამინისტროშიც დაადასტურეს. მინისტრის მოადგილემ ანა მალიარმა მადლობა გადაუხადა საზღვაო ქვეითებს და ხაზგასმით აღნიშნა, რომ მთელი უკრაინული მიწა გათავისუფლდება.
„ეროვნული დროშა ისევ ფრიალებს სტოროჟევოეზე და ეს მოხდება ყველა დასახლებაში, სანამ არ გავათავისუფლებთ მთელ უკრაინულ მიწას. მადლობა კონტრადმირალ მიხაილ ოსტროგრადსკის სახელობის საზღვაო ქვეითთა 35-ე ცალკეულ ბრიგადას. გაგრძელება იქნება“, - წერს მალიარი.
შეგახსენებთ, გუშინ გავრცელდა ინფორმაცია, რომ უკრაინელებმა დონეცკის ოლქში, ბლახოდატნეს, ნესკუჩნესა და მაკარივკას დასახლებები გაათავისუფლეს.
v-if="article.gallery" v-html="article.gallery"
