სახელმწიფო დეპარტამენტის სპიკერის მოადგილე აცხადებს, რომ ვლადიმერ პუტინი არ არის დაინტერესებული ომის დასრულების შესახებ მოლაპარაკებები აწარმოოს

რუსეთის პრეზიდენტი ვლადიმერ პუტინი, მიუხედავად მისი განცხადებებისა, არ არის განწყობილი იმისთვის, რომ უკრაინაში ომის დასრულების შესახებ მოლაპარაკებები აწარმოოს, რადგან აგრძელებს ქალაქების და სამოქალაქო პირების დაბომბვას.

განცხადება ამის შესახებ აშშ-ს სახელმწიფო დეპარტამენტის სპიკერის მოადგილემ ვედანტ პატელმა გააკეთა.

"პუტინი ბევრ რამეზე საუბრობს, და თქვენი გადასაწყვეტია, თუ რამდენია იქიდან სიმართლე და რამდენია - სიცრუე. ისევ და ისევ, სრულიად გასაგებია, რომ რუსეთის ქმედებები - კიევის დაბომბვა, სამოქალაქო, ენერგეტიკულ ინფრასტრუქტურაზე, საცხოვრებელ სახლებზე, საავადმყოფოებზე დარტყმების განხორციელება - ვერ იქნება მშვიდობის მიღწევის და ომის დასრულების დაინტერესების პირობა“, - დასძინა აშშ-ს სახელმწიფო დეპარტამენტის სპიკერის მოადგილემ.