პარლამენტის თავმჯდომარე შალვა პაპუაშვილმა ფრიდონ ინჯიას ინიციატივას, რომ არჩევნებში ხმის მიცემის უფლება არაელექტრონული პირადობის მოწმობების მფლობელებსაც მიეცეთ, სამსჯელო საკითხი უწოდა.

როგორც პაპუაშვილმა აღნიშნა, ოპოზიციას, რომელიც ამ ინიციატივას აკრიტიკებს, შეუძლია წარმოადგინოს საკუთარი არგუმენტები რისკებთან დაკავშირებით და ასევე, წარმოადგინოს ამ რისკების დაძლევისთვის საჭირო წინადადებები.

პაპუაშვილის ინფორმაციით, საქართველოში არ არის მოსახლეობის დიდი ჯგუფი, რომლებიც ჯერ კიდევ ინარჩუნებს ძველ პირადობის მოწმობებს, მაგრამ მათ არჩევნებში მონაწილეობის უფლება არ უნდა შეეზღუდოთ.

„აბსურდია მსჯელობა ხმების გაყალბებაზე პირადობის მოწმობებთან დაკავშირებით. ეს არის საკითხი, რომელიც საჭიროებს მსჯელობას და მათ შეუძლიათ, წარმოადგინონ საკუთარი არგუმენტები რისკებთან დაკავშირებით და მეორე მხრივ, წინადადებები თუ რაიმე რისკებს ხედავენ, ეს რისკები როგორ უნდა იყოს დაზღვეული. კიდევ ერთხელ, არ არის დიდი რაოდენობა მოქალაქეობის, რამდენიმე ათასი ადამიანია, არ არის დიდი ჯგუფი, მაგრამ ეს არიან საქართველოს მოქალაქეები და ჩვენ უნდა მოვძებნოთ გზა, რომ არ შევუზღუდოთ მოქალაქეებს, მიიღონ მონაწილეობა არჩევნებში. ეს არის საკითხი, რომელიც საჭიროებს მსჯელობას. საბოლოო გადაწყვეტილებაზე ჩამოვყალიბდებით. საქმე იმაშია, რომ არიან მოქალაქეები, რომლებიც სხვა მხრივაც პირადადაც მოგვმართავენ, თქვენ გარემოცვაში იქნებიან, ალბათ, რომლებსაც აქვთ ჯერ კიდევ ძველი პირადობა და არის დილემური სიტუაცია. ერთი მხრივ, რა თქმა უნდა, იუსტიციის სამინისტროს მუდმივად აქვს აქციები, რომ უფასოდ, წახალისებით, ადგილზე მისვლით, მობილური იუსტიციის სახლებით ჩაანაცვლოს ძველი პირადობები და მისცეს ახალი პირადობის მოწმობები, მაგრამ არიან მოქალაქეები, რომლებიც ინარჩუნებენ ძველ პირადობებს და საჭიროა ამისთვის რაღაც გამოსავლის მოძებნა“, - განაცხადა პაპუაშვილმა.

ცნობისთვის, პარლამენტის იურიდიულ საკითხთა კომიტეტმა მხარი დაუჭირა დეპუტატ ფრიდონ ინჯიას ინიციატივას, რომლის დამტკიცების შემთხვევაში, არჩევნებში მონაწილეობის და ხმის მიცემის უფლებით არაელექტრონული პირადობის მოწმობების მქონე მოქალაქეებიც შეძლებენ.