“სახელმწიფო კომპენსაციისა და სახელმწიფო აკადემიური სტიპენდიის შესახებ“ კანონით განსაზღვრული კომპენსაცია ინდექსაციას დაექვემდებარება.

მთავრობის ინიციატივით კანონში დაგეგმილი ცვლილებების მიზანს ყოფილი ძალოვანი უწყებებიდან დათხოვილი პირების, ასევე იმ ადამიანების კომპენსაციის ზრდა წარმოადგენს, ვინც კანონიდან გამომდინარე განსხვავებულ კომპენსაციას იღებენ.

დაგეგმილი ცვლილებებით კომპენსაციის არსებული 560 ლარიანი ლიმიტი იზრდება და 1 000 ლარით განისაზღვრება. ამასთან, როგორც შს მინისტრის მოადგილემ ალექსანდრე დარახველიძემ პარლამენტის ჯანდაცვის კომიტეტის სხდომაზე განაცხადა, ფინანსთა სამინისტოსთან შედგა შეთანხმება ინდექსაციის შესახებ.

“1000 ლარიანი ჭერი 2025 წლის ბოლომდე იქნება. ამის შემდეგ ბიუჯეტის ყველა დამტკიცებისას ინდექსაციის საკითხი განისაზღვრება, რაც იმას ნიშნავს, რომ რამდენი ლარითაც საბაზისო პენსია გაიზრდება, ანალოგიურად მოხდება ზედა ჭერის ზრდა.

ამ სიკეთით ისარგებლებენ როგორც ძალოვანი უწყებების ყოფილი თანამშრომლები, ასევე ყოფილი მოსამართლეები, პროკურორები, პარლამენტარები, პარლამენტის აპარატის თანამშრომლები, ყოფილი დიპლომატები, სამოქალაქო ავიაციის მოსამსახურეები, გენერალური აუდიტორი და მისი მოადგილე“, - განაცხადა ალექსანდრე დარახველიძემ.

“სახელმწიფო კომპენსაციისა და სახელმწიფო აკადემიური სტიპენდიის შესახებ“ კანონში დაგეგმილ ცვლილებებს კომიტეტი მეორე მოსმენით - მუხლობრივად იხილავს.