ივნისში გასამართი ევროპარლამენტის არჩევნების გამო, ევროკავშირს გაფართოების შესახებ საჯაროდ საუბარი არ სურს, - ამის შესახებ ინფორმაციას Politico ევროკავშირის ოფიციალურ პირებზე დაყრდნობით ავრცელებს.

Politico-ს ცნობით, ევროპარლამენტის არჩევნების წინ ევროკავშირის გაფართოების შესახებ საუბრის მინიმუმამდე დაყვანის მიზეზს ევროპელი ფერმერების პროტესტი წარმოადგენს, განსაკუთრებით მაშინ, როცა ევროპელი ლიდერები ფერმერების დასამშვიდებლად დათმობებზე მიდიან.

„მოდით, ვიყოთ გულახდილები: ევროპის არჩევნებამდე ამის (გაფართოების) შესახებ საუბარი არავის სურს“, - განუცხადა Politico-ს ერთ-ერთმა ოფიციალურმა პირმა.

ევროკავშირის ზოგიერთმა ოფიციალურმა წარმომადგენელმა გამოცემას განუცხადა, რომ მათ ურჩევნიათ უკრაინის, მოლდოვის, საქართველოსა და დასავლეთ ბალკანეთის სახელმწიფოების ინტეგრაციასთან დაკავშირებით მუშაობა დახურულ კარს მიღმა გააგრძელონ.