გორის მუნიციპალიტეტის მერმა, ვლადიმერ ხინჩეგაშვილმა სოფელ ნაწრეტში ახალი ჭაბურღილის მოწყობის სამუშაოები დაათვალიერა.

გორის მუნიციპალიტეტის მერიის ინფორმაციით, ჭაბურღილი ორ სოფელში მცხოვრებ მოსახლეობას მოემსახურება.

„პროექტის დასრულების შემდეგ ობიექტი ნაწრეტში მცხოვრებ 260 ოჯახს და ქვემო შავშვებში მცხოვრებ 95 ოჯახს 24 საათის განმავლობაში მოემსახურება.

პროექტი ნაწრეტში სასმელი წყლის ხარისხის გაუმჯობესების მიზნით ხორციელდება.

გარდა ამ სოფლისა, წყლის სისტემების მოწყობა გორის მუნიციპალიტეტის კიდევ ორ სოფელში, ტირძნისსა და ზერტში დაიწყება.

მიმდინარე პროექტების დასრულების შემდეგ გორის მუნიციპალიტეტის სოფლებში სასმელი წყლით მოსახლეობის 95% იქნება უზრუნველყოფილი“, - აღნიშნულია ინფორმაციაში.