გერმანიის საგარეო საქმეთა მინისტრი, ანალენა ბერბოკი დღეს ისრაელში გაემგზავრება, რათა რეგიონში დაძაბულობის ესკალაციის თავიდან აცილების საკითხი განიხილოს. Reuters-ის ინფორმაციით, ამის შესახებ ბერბოკმა ბერლინში, იორდანიელ კოლეგასთან, აიმან საფადისთან ერთობლივ პრესკონფერენციაზე განაცხადა.

”ჩვენთვის, როგორც გერმანიის ფედერალური მთავრობისთვის, ამ მყიფე დროში წარმოუდგენლად მნიშვნელოვანია, რომ ყველამ ერთად ვიმუშაოთ, რათა ხელი შევუწყოთ დეესკალაციას მთელი რეგიონისთვის“, - აღნიშნა ბერბოკმა.

თავის მხრივ, საფადიმ განაცხადა, რომ საერთაშორისო საზოგადოებამ არ უნდა დაუშვას, რომ ბენიამინ ნეთანიაჰუმ, ირანთან დაპირისპირებით ღაზაში არსებული ვითარებიდან ყურადღება გადაიტანოს, სადაც ისრაელი ექვსი თვის განმავლობაში ახორციელებს სამხედრო ოპერაციას და სადაც, ადგილობრივი ჯანდაცვის ორგანოების ცნობით, 33 000-ზე მეტი პალესტინელი დაიღუპა.