აშშ-ის საჰაერო თავდასხმის შედეგად სირიაში ე.წ. „ისლამური სახელმწიფოს“ (ISIS) მაღალჩინოსნის ლიკვიდაცია განხორციელდა, - ინფორმაციას CNN-ი აშშ-ის შეიარაღებული ძალების ცენტრალურ სარდლობაზე დაყრდნობით ავრცელებს.
„აშშ-ის ცენტრალურმა სარდლობამ სირიაში ავიაიერიში განახორციელა, რის შედეგადაც „ისლამური სახელმწიფოს“ მაღალი თანამდებობის პირი, უსამა ჯამალ მუჰამედ იბრაჰიმ ალ-ჯანაბი დაიღუპა“, - აცხადებენ აშშ-ის ცენტრალურ სარდლობაში.
მათივე მტკიცებით, არ არსებობს არავითარი მინიშნება, რომ თავდასხმის შედეგად სამოქალაქო პირები დაშავდნენ.
2024 წლის იანვრიდან მარტამდე პერიოდში, აშშ-ის ცენტრალურმა სარდლობამ და მისმა პარტნიორებმა სირიაში ე.წ. „ისლამური სახელმწიფოს“ შვიდი წევრის ლიკვიდაცია განახორციელეს და 27 დააკავეს, ამავე პერიოდში, ერაყში ISIS-ის 11 წევრის ლიკვიდაცია განხორციელდა, 36 კი - დააკავეს.