კონგრესმენების ჯგუფი პენტაგონს F-16-ებზე მეტი უკრაინელი პილოტის გაწვრთნისკენ მოუწოდებს, - ამის შესახებ ინფორმაციას Politico ავრცელებს.

Politico-ს ცნობით, აშშ-ის წარმომადგენელთა პალატის „დემოკრატი“ წევრები, ადამ შიფის ხელმძღვანელობით, F-16-ებზე კიდევ 10 უკრაინელი პილოტის მომზადების შესახებ უკრაინის თხოვნას მხარს უჭერენ და აშშ-ის თავდაცვის მდივანს, ლოიდ ოსტინს წერილით მიმართავენ, რომ თხოვნა დააკმაყოფილოს.

„წლის ბოლოსთვის უკრაინის განკარგულებაში უფრო მეტი F-16 თვითმფრინავი იქნება, ვიდრე კვალიფიციური პილოტი, მათ სამართავად. ეს სიტუაცია საფრთხეს უქმნის იმ სტრატეგიულ უპირატესობებს, რომლებიც ამ თვითმფრინავებმა შეიძლება უკრაინას მიანიჭონ“, - ნათქვამია 15 კონგრესმენის წერილში.