სუს-ი არის ტყუილების სამჭედლო - 26 ოქტომბრიდან, პირველი, რაც გაუქმდება ამ ქვეყანაში, იქნება სუს-ი, - ამის შესახებ პლატფორმა „ერთიანობის“ ერთ-ერთმა ლიდერმა, „სტრატეგია აღმაშენებლის“ თავმჯდომარემ, გიორგი ვაშაძემ ჟურნალისტებთან საუბრისას განაცხადა, რითაც სავარაუდო ტერორისტული აქტის მოწყობაზე დასმულ კითხვას უპასუხა.

მისივე თქმით, სახელმწიფო უსაფრთხოების სამსახურში ბევრი „მუცლით მეზღაპრეობა მიმდინარეობს“.

„სუს-ში ბევრი სიყალბე, ბევრი მუცლით მეზღაპრეობა მიმდინარეობს. სუს-ი კი არა, ესენი არიან ზღაპრის გამგრძელებლები, ტყუილების სამჭედლო. მეტი ხომ არაფერია ეს ორგანო, სამწუხაროდ. ამიტომ გავაუქმებთ მაგას. 26 ოქტომბრიდან, პირველი, რაც გაუქმდება ამ ქვეყანაში, იქნება სუს-ი. თქვენ ნახავთ, რომ გავაუქმებთ სუს-ს. აღარ იქნება საქართველოში სუს-ი და აღარ იქნება ეს ძალადობა, ხალხზე ფსიქოლოგიური ტერორი,“ - განაცხადა ვაშაძემ.

ცნობისთვის, სახელმწიფო უსაფრთხოების სამსახური იძიებს უკრაინაში მყოფი, საქართველოს ხელისუფლების ყოფილი მაღალჩინოსნებისა და ძალოვანი უწყებების ყოფილი თანამშრომლების ორგანიზებით და დაფინანსებით, საქართველოში დანაშაულებრივი ქმედებების, მათ შორის, პარტია „ქართული ოცნების“ საპატიო თავმჯდომარის, ბიძინა ივანიშვილის მკვლელობის მომზადების ფაქტებს.

„სახელმწიფო უსაფრთხოების სამსახური ხსენებული დანაშაულებრივი ქმედებების მიზნად, ქვეყანაში არეულობის მოწყობის და ხელისუფლების დასუსტების ფონზე, დესტრუქციული ძალების მიერ სახელმწიფო ხელისუფლების ძალადობრივი გზით დამხობას ისახავს.

სუს-ში გამოძიება ტერორისტული აქტის მომზადების და სახელმწიფო ხელისუფლების დასამხობად შეთქმულების ფაქტზე საქართველოს სსკ-ის 18-323-ე მუხლის პირველი ნაწილით და 315-ე მუხლის პირველი ნაწილით მიმდინარეობს“, - ნათქვამია სუს-ის ინფორმაციაში.