ქართველი ხალხის ზეიმს, რომელსაც რამდენიმე დღეა აღვნიშნავთ, ვერაფერი გააფუჭებს, - ეს განცხადება საქართველოს პარლამენტის თავმჯდომარემ შალვა პაპუაშვილმა ქართველი ოლიმპიელების დაჯილდოების ცერემონიალის შემდეგ ჟურნალისტებთან გააკეთა.

პაპუაშვილმა, ასევე, ისაუბრა პრეზიდენტ სალომე ზურაბიშვილის დღევანდელ ბრიფინგზე, სადაც პრეზიდენტმა განაცხადა, რომ ქართველი ოლიმპიელების დაჯილდოება მას შემდეგ მოხდება, რაც ქართველი პარაოლიმპიელებიც დაბრუნდებიან სამშობლოში და მოეწყობა დიდი სახალხო ზეიმი.

პაპუაშვილის შეფასებით, ზურაბიშვილის აღნიშნული განცხადება დღევანდელ ღონისძიებაში ხინჯის შეტანის მცდელობა იყო.

„ქართველი ხალხის ზეიმს, რომელსაც რამდენიმე დღეა, აღვნიშნავთ, ვერაფერი გააფუჭებს. მე ასეთი შთაბეჭდილება მრჩება, რომ ქალბატონი სალომე ზურაბიშვილის დღევანდელი განცხადების მიზანი სწორედ ის იყო, რომ ამ ზეიმშიც რაღაც ხინჯი შეეტანა, რაშიც ჩვენ, უბრალოდ, არ უნდა ავყვეთ. მთელი ერი ზეიმობს, ყველა ზეიმობს გამარჯვებას და გვიხარია ჩვენი ოლიმპიელების შედეგები და ჩვენ მათ შორის, უმაღლეს ჯილდოებზე წარდგენით ვეცადეთ, გვეჩვენებინა ჩვენი სახელმწიფოს დამოკიდებულება ჩვენი ოლიმპიელების მიმართ“, - განაცხადა შალვა პაპუაშვილმა.