ვიღაც-ვიღაცებს ავიწყდებათ საქართველოს ისტორია, ან მიყვებიან კრემლის მითითებას - რამდენიც არ უნდა ეცადოს კრემლი, გადაიწეროს ისტორია, ისტორიის გაყალბება მათ ამჯერად არ გამოუვათ, - ამის შესახებ კოალიცია „ძლიერი საქართველოს“ ერთ-ერთმა ლიდერმა, ანა ნაცვლიშვილმა აგვისტოს ომის გამოძიებასთან დაკავშირებით ჟურნალისტებს განუცხადა.

ნაცვლიშვილის თქმით, საქართველოს მოსახლეობამ კარგად იცის ვინ მტერია და ვინ -მოყვარე.

„როგორც ჩანს და ეს ძალიან სამწუხარო და სამარცხვინოა, ვიღაც-ვიღაცებს ავიწყდებათ საქართველოს ისტორია, ან მიყვებიან კრემლის მითითებას იმის შესახებ, რომ საქართველოს ისტორია იყოს გადაწერილი. ორ საუკუნეზეა მეტია, რუსეთი ებრძვის საქართველოს დამოუკიდებლობას; რუსეთი ძირს უთხრის საქართველოს სახელმწიფოებრიობას. როგორც ჩანს, არ იციან ეს ისტორია კონკრეტულმა ადამიანებმა ან მიყვებიან კრემლის პირდაპირ დირექტივას. საბედნიეროდ, ამ ქვეყნის მოქალაქეებმა ძალიან კარგად ვიცით ვინ არის მტერი, ვინ არის მოყვარე, ვინ არის აგრესორი, როდის დაიწყო რუსეთმა საქართველოს სახელმწიფოებრიობის წინააღმდეგ მოქმედება. ძალიან კარგია, რომ ეს სიმართლე ასევე, ბევრი ადამიანის ძალისხმევით, იცის საერთაშორისო საზოგადოებამაც. რამდენიც არ უნდა ეცადოს კრემლი, გადაიწეროს ისტორია, ისტორიის გაყალბება მათ ამჯერად არ გამოუვათ“,- განაცხადა ანა ნაცვლიშვილმა.