რაჟდენ კუპრაშვილი თავისი ფიქტიური ბიუროთი „ქართული ოცნების“ დავალებას ასრულებს - ანტიკორუფციული ბიურო მანდატიდან გავიდა! - ეს განცხადება პარლამენტში ოპოზიციონერმა დეპუტატმა ხატია დეკანოიძემ გააკეთა.

დეკანოიძის აზრით, ანტოკორუფციული ბიუროს ხელმძღვანელმა ბიძინა ივანიშვილის დავალება შეასრულა.

„რაჟდენ კუპრაშვილის განცხადება დანაშაულებრივია. მას არავინ ეკითხება ისეთ გადაწყვეტილებას, რაც არასამთავრობო სექტორთან დაკავშირებით მიიღო.

ჩვენ ამ ხელისუფლებას 26 ოქტომბერს დავასრულებთ და ჩვენი გამარჯვების შემდეგ რაჟდენ კუპრაშვილისნაირი დამნაშავეები ვერ იქნებიან წამყვანი ანტიკორუფციული მიმართულებით“, - განაცხადა დეკანოიძემ.

ანტიკორუფციული ბიუროს გადაწყვეტილებით, „საერთაშორისო გამჭვირვალობა – საქართველო“, მისი დირექტორი ეკა გიგაური, ასევე ორგანიზაცია „აირჩიე ევროპა“, მისი დირექტორი ხათუნა ლაგაზიძე და თანადამფუძნებლები ცნობილ იქნენ გაცხადებული საარჩევნო მიზნის მქონე სუბიექტებად და მათზე „მოქალაქეთა პოლიტიკური გაერთიანების შესახებ“ ორგანული კანონის მესამე თავით გათვალისწინებული შეზღუდვები გავრცელდება.

როგორც ბიუროს ხელმძღვანელმა რაჟდენ კუპრაშვილმა განაცხადა, რომ ამ ორ ორგანიზაციას და მათ ხელმძღვანელებს დაევალათ, 5 დღის ვადაში ბიუროს წარუდგინონ ფინანსური ანგარიშები, ასევე გახსნან და წარადგინონ ინფორმაცია იმ საბანკო ანგარიშების რეკვიზიტებზე, რომელიც საარჩევნო მიზნებისთვის გამოიყენება.