„სელფი მობაილი“, ქართული მობილური ოპერატორი, რომელიც საქართველოში 1.3 მლნ. აბონენტს ემსახურება, ტრადიციულად, მსოფლიო მასშტაბის ჰაკათონის, Nasa Space Apps Challenge 2024-ის ადგილობრივი კონკურსის მხარდამჭერია. აღნიშნულის შესახებ ინფორმაციას „სელფი“ ავრცელებს.

მათივე ცნობით, „სელფი“ უკვე მეხუთე წელია, რაც ჰაკათონს მხარს უჭერს და გამარჯვებულებს ეხმარება, საერთაშორისო დონეზე საკუთარი იდეა წარადგინონ.

„ჰაკათონი ყოველწლიურად, ერთდროულად მსოფლიოს 300-მდე სხვადასხვა ქალაქში იმართება და გლობალურად ათასობით მონაწილეს აერთიანებს. წლევანდელი ჰაკათონის მთავარი თემაა „The Sun Touches Everything“. ორი დღის განმავლობაში, მონაწილეები ინტენსიურად იმუშავებენ და საკითხის ირგვლივ მწვავე პრობლემას, ნასას მონაცემებზე დაყრდნობით, მოუნახავენ ინოვაციურ გადაწყვეტას. შემდეგ ეტაპზე, ადგილობრივი ჰაკათონის გამარჯვებულები ნამუშევრებს გლობალურ დონეზე წარადგენენ და Nasa Space Apps Challenge-ის მთავარ ჰაკათონზე მონაწილეობას მიიღებენ.

საკუთარ პროექტებზე გუნდურად მუშაობის გარდა, მონაწილეებს შესაძლებლობა აქვთ, ჰაკათონის განმავლობაში დაესწრონ „ვორქშოპებს“ ქვეყნის წამყვანი სპეციალისტების ხელმძღვანელობით.

Nasa Space Apps Challenge 2024-ის ორგანიზატორები არიან სტარტაპ ბიურო და საქართველოს ეროვნული უნივერსიტეტი - სეუ“, -აღნიშნულია ინფორმაციაში.