ლაზერის გამოყენება გამოხატვის უფლებაა - გამოსვლის დროს ლაზერს ტრიბუნაზე ირაკლი კობახიძესაც ანათებდნენ! - ეს განცხადება მედიასთან უმრავლესობის დეპუტატმა ირაკლი ქადაგიშვილმა გააკეთა.

ქადაგიშვილმა აღნიშნა ისიც, რომ „გამოხატვის უფლების განხორციელების შედეგია ის, რომ თუ პარლამენტის შენობას წრეს დაარტყამ, ნახავ, რომ ეს არის დასახიჩრებული შენობა სწორედ გამოხატვის თავისუფლებიდან გამომდინარე“.

მისივე შეფასებით, 20 ოქტომბრის აქცია ოპოზიციის ფიასკო იყო, რითაც საპარლამენტო არჩევნებში მარცხი წინასწარ გაიფორმეს.

„20 ოქტომბრის აქცია ძალების დემონსტრირების მცდელობა იყო. სურდათ ეჩვენებინათ, არჩევნების წაგების შემთხვევაში, რა ძალები ჰყავთ. ობიექტური კადრებით კარგად დავინახეთ, რომ მათ ამბიციურ განცხადებებთან და მზადებასთან შეფარდებით, მომიტინგეთა რაოდენობა საკმაოდ მწირი იყო - ზოგიერთ ტელევიზიას „ქართული ოცნების“ მიტინგის კადრიც კი გაეპარა. იმისთვის, რომ ხალხის რაოდენობა გაეზარდათ, „ქართული ოცნების“ აქციის კადრი იყო ჩართული. ეს იმას ნიშნავს, რომ ოპოზიციას გარკვეული მხარდამჭერები ჰყავს, თუმცა გუშინდელი აქციით დამარცხება წინასწარ გაიფორმეს“, - განაცხადა ირაკლი ქადაგიშვილმა.