საქართველოს ეროვნულ ბანკში კომერციული ბანკების, საბანკო ასოციაციისა და საგადახდო მომსახურების პროვაიდერებისთვის სებ-ის მიერ საგადახდო ინფრასტრუქტურის ტრანსფორმაციის მიზნით დაგეგმილი ორი მიმდინარე პროექტის პრეზენტაცია გაიმართა.
ეროვნული ბანკის ინფორმაციით, შეხვედრას სებ-ის პრეზიდენტის მოვალეობის შემსრულებელი ნათია თურნავა და ვიცე-პრეზიდენტი ეკატერინე გალდავა ესწრებოდნენ.
„ახალი საგადახდო სისტემა საშუალებას მისცემს მომხმარებელს ნებისმიერ დღეს და დროს განახორციელოს გადახდა, რომელიც მყისიერად შესრულდება“, - აღნიშნა შეხვედრის დასრულების შემდეგ ნათია თურნავამ.
ეროვნული ბანკის ცნობით, შეხვედრის ფარგლებში არსებული დროის რეალურ რეჟიმში ანგარიშსწორების სისტემის - RTGS სისტემის განახლებისა და სრულიად ახალი ტიპის - მყისიერი გადახდების სისტემის დანერგვის პროექტების პრეზენტაცია გაიმართა.
„საგადახდო სისტემების დეპარტამენტის უფროსმა ნატალია ჭყოიძემ პრეზენტაციის ფორმატში დეტალურად გააცნო დამსწრე საზოგადოებას ახალი საგადახდო სისტემების ფუნქციონალი, მათი უპირატესობები და სარგებელი, როგორც კომერციული ბანკებისა და ფინტექ კომპანიებისთვის, ასევე ამ სისტემების საბოლოო მომხმარებლებისთვის.
მყისიერი გადახდების განახლებული სისტემა დააჩქარებს და გაამარტივებს გადახდების პროცესს და თანხის ხელმისაწვდომობას გადარიცხვის მიმღებისთვის, ხელს შეუწყობს ინოვაციებსა და კონკურენციის ზრდას და სხვა“, - ნათქვამია ინფორმაციაში.
