იმ ვითარებით, რაც საპარლამენტო არჩევნების შემდეგ შეიქმნა, ნათლად ჩანს, რომ ქვეყანა პოლიტიკურ კრიზისში შედის. პრეზიდენტის ჩართულობით უნდა შეიქმნას კრიზისების მართვის საკოორდინაციო საბჭო, სადაც წარმოდგენილი იქნებიან ყველა პოლიტიკური პარტიების წარმომადგენლები, რომლებიც არჩევნებში მონაწილეობდნენ და არ აღიარებენ მის შედეგებს, - ამის შესახებ პარტია „ევროპელი დემოკრატების“ თავმჯდომარემ, პაატა დავითაიამ განაცხადა.

მისივე თქმით, ამ საპარლამენტო არჩევნებითაც დადასტურდა ის, თუ რამდენად მნიშვნელოვანი იყო პოლიტიკური პარტიების ერთობა, რაზეც საზოგადოების მოთხოვნა იყო.

„საპარლამენტო არჩევნების შედეგებმა გააჩინა კითხვის ნიშნები პოლიტიკურ პარტიების, საზოგადოების, არასამთავრობო სექტორის, ჩვენი პარტნიორი ქვეყნების, საერთაშორისო და სადამკვირვებლო მისიების მხრიდან. ხაზგასმით მინდა ვთქვა, რომ საპარლამენტო არჩევნები არ გაყალბებულა მხოლოდ ოთხი პოლიტიკური გაერთიანებისთვის, რომელთაც 5%-იანი ბარიერი გადალახეს, შესაბამისად, არასწორია მიდგომა, რომ თითქოსდა, მხოლოდ მათი პარტიების შედეგები გაყალბდა. მოვუწოდებ ყველა პოლიტიკურ პარტიას, რომელიც მონაწილეობდა არჩევნებში და არ აღიარებს შედეგებს, მკაფიოდ გამოხატონ თავისი პოზიცია.

მნიშვნელოვანია, საზოგადოებამ და საერთაშორისო ორგანიზაციებმა დაინახონ, რომ არჩევნებში მონაწილე პოლიტიკური პარტიები არიან ერთიანი და არა ჯგუფურად დაყოფილი, მიღებული ხმების რაოდენობის მიხედვით, რაც დამაზიანებელი იქნება პოლიტიკური პროცესისთვის,“ - განაცხადა პაატა დავითაია, რომლის კომენტარსაც „ევროპელი დემოკრატების“ პრესსამსახური ავრცელებს.