თუ საქართველო არ შეატრიალებს მოქმედების მიმდინარე კურსს, რომელიც საფრთხეს უქმნის მის ევროკავშირის გზას და არ გამოიჩენს ხელშესახებ ძალისხმევას გადაუწყვეტელი პრობლემებისა და ძირითადი რეფორმების გადასაჭრელად, კომისია ვერ შეძლებს განიხილოს საქართველოსთან მოლაპარაკებების დაწყების რეკომენდაცია, - ამის შესახებ გაფართოების პოლიტიკის შესახებ ევროკომისიის კომუნიკაციაშია აღნიშნული.

ევროკომისია აცხადებს, რომ 2023 წლის დეკემბერში საქართველოსთვის კანდიდატის სტატუსის მინიჭებას არ მოჰყვა ხელისუფლების საკმარისი პოლიტიკური ვალდებულება განახორციელოს აუცილებელი რეფორმები ქვეყნის ევროკავშირის გზაზე წინსვლისთვის. პირიქით, მნიშვნელოვანმა ნეგატიურმა მოვლენებმა, მათ შორის უცხოური გავლენის გამჭვირვალობის შესახებ კანონის და „ოჯახური ღირებულებებისა და არასრულწლოვანთა დაცვის შესახებ“ საკანონმდებლო პაკეტის მიღებამ, ისევე როგორც ქართველი ოფიციალური პირების ძლიერმა ევროკავშირის საწინააღმდეგო ნარატივებმა, მძიმედ დააზარალა საქართველოს ევროკავშირის ტრაექტორია.

„შედეგად, საქართველოს გაწევრიანების პროცესი დე ფაქტო შეჩერდა. საქართველომ ასევე უმნიშვნელო პროგრესს მიაღწია ევროკომისიის 2023 წლის გაფართოების შესახებ კომუნიკაციით განსაზღვრული ცხრა ნაბიჯის განხორციელებაში. 26 ოქტომბერს საქართველოს მოქალაქეებმა მონაწილეობა მიიღეს საპარლამენტო არჩევნებში. ეუთო-ს დემოკრატიული ინსტიტუტებისა და ადამიანის უფლებათა ოფისის (OSCE/ODIHR) არჩევნების საერთაშორისო სადამკვირვებლო მისიის წინასწარი დასკვნებმა გამოავლინა რამდენიმე ხარვეზი, რომლებიც დაძაბულ და ძლიერ პოლარიზებულ გარემოში მოხდა. მოხსენებული სისუსტეები მოიცავს საარჩევნო პროცესის ბოლოდროინდელ საკანონმდებლო ცვლილებებს, ხმის ფარულობასთან დაკავშირებულ ხშირ კომპრომისებს, პროცედურულ შეუსაბამობებს, დაშინებას და ზეწოლას ამომრჩევლებზე, რამაც უარყოფითად იმოქმედა პროცესის მიმართ საზოგადოების ნდობაზე“, - აღნიშნულია დოკუმენტში.

ევროკომისია ხაზს უსვამს, რომ ეს წინასწარი დასკვნები ადასტურებს ყოვლისმომცველი საარჩევნო რეფორმის აუცილებლობას, რაც უკვე ხაზგასმული იყო წინა ძირითად რეკომენდაციებში.

„OSCE/ODIHR-ის საბოლოო ანგარიშის რეკომენდაციები უნდა განხორციელდეს რაც შეიძლება მალე. პოლიტიკური სპექტრის მასშტაბით კონსტრუქციული და ინკლუზიური დიალოგი ახლა უმთავრესია. ევროპული საბჭოს 17 ოქტომბრის დასკვნების შესაბამისად, ევროკავშირი მოუწოდებს საქართველოს განახორციელოს დემოკრატიული, ყოვლისმომცველი და მდგრადი რეფორმები, ევროინტეგრაციის ძირითადი პრინციპების შესაბამისად“, - აღნიშნულია დოკუმენტში.

ევროკომისია ასევე ხაზს უსვამს, რომ საქართველომ ცხრა ნაბიჯის განხორციელება პრიორიტეტულ საკითხად უნდა აქციოს.

„საქართველომ ცხრა ნაბიჯის განხორციელება პრიორიტეტულ საკითხად უნდა აქციოს. გარდა ამისა, საქართველომ უნდა გააუქმოს კანონი უცხოური გავლენის გამჭვირვალობის შესახებ, საკანონმდებლო პაკეტი „ოჯახური ღირებულებებისა და არასრულწლოვანთა დაცვის შესახებ“ და თავი შეიკავოს კანონის უზენაესობისა და ფუნდამენტური უფლებების შელახვისგან, რომლებიც რჩება ევროკავშირი-საქართველოს ურთიერთობის განუყოფელ ნაწილად. საქართველომ ასევე უნდა განაახლოს ძალისხმევა გენდერული თანასწორობის მისაღწევად“, - აღნიშნულია დოკუმენტში.

ევროკომისია აცხადებს, რომ ევროკავშირის საერთო საგარეო და უსაფრთხოების პოლიტიკასთან საქართველოს თანხვედრა რჩება დაბალი და მიუხედავად იმისა, რომ იგი ცდილობდა შეეზღუდა სანქციების გვერდის ავლა მისი ტერიტორიის გავლით, საქართველო არ შეუერთდა ევროკავშირის სანქციების პაკეტებს რუსეთისა და ბელარუსის წინააღმდეგ.

„უფრო მეტიც, ხელისუფლებამ უნდა შეწყვიტოს დეზინფორმაციის გავრცელება ევროკავშირის ღირებულებების წინააღმდეგ და ამის ნაცვლად გააძლიეროს მოქმედებები დეზინფორმაციასთან საბრძოლველად და მტრული პოლიტიკური რიტორიკის დასაძლევად“, - აღნიშნულია დოკუმენტში.

ევროკომისია აცხადებს, რომ ხელისუფლებამ უნდა უზრუნველყოს, რომ მედიასაშუალებებზე, ოპოზიციურ პარტიებსა და სამოქალაქო საზოგადოების აქტივისტებზე თავდასხმები სათანადოდ იყოს გამოძიებული და უზრუნველყოფილი იყოს მათი მუშაობისთვის ხელსაყრელი გარემო.

ამასთან, საჭიროა ყოვლისმომცველი და მნიშვნელოვანი ნაბიჯების გადადგმა კანონის უზენაესობის რეფორმის, მაღალი დონის კორუფციის დაძლევისა და ოლიგარქიული გავლენის აღმოფხვრის მიმართულებით, რაც შესაძლებელს გახდის საკმარის საჯარო და საპარლამენტო ზედამხედველობას სამართალდამცავი უწყებების მუშაობაზე და უზრუნველყოს საჯარო ინსტიტუტების დამოუკიდებლობას.

„ევროკავშირი რჩება ერთგული კიდევ უფრო გააღრმაოს პარტნიორობა საქართველოსთან, საქართველოს მოსახლეობის დიდი უმრავლესობის მისწრაფებების შესაბამისად. თუ საქართველო არ შეატრიალებს მოქმედების მიმდინარე კურსს, რომელიც საფრთხეს უქმნის მის ევროკავშირის გზას და არ გამოიჩენს ხელშესახებ ძალისხმევას გადაუწყვეტელი პრობლემებისა და ძირითადი რეფორმების გადასაჭრელად, კომისია ვერ შეძლებს განიხილოს საქართველოსთან მოლაპარაკებების დაწყების რეკომენდაცია“, - აღნიშნულია დოკუმენტში.