გაერო-ში აშშ-ის მიერ კუბის წინააღმდეგ დაწესებული ეკონომიკური ემბარგოს მოხსნის მხარდაჭერის შემდეგ არგენტინის პრეზიდენტმა საგარეო საქმეთა მინისტრი თანამდებობიდან გაათავისუფლა, - ამის შესახებ ინფორმაციას არგენტინის პრეზიდენტის, ხავიერ მილეის პრესსპიკერი, მანუელ ადორნი ავრცელებს.

მანუელ ადორნის ცნობით, დიანა მონდინოს საგარეო საქმეთა მინისტრის თანამდებობაზე აშშ-ში არგენტინის ელჩი, ხერარდო ვერტეინი შეცვლის.

არგენტინის პრეზიდენტის ადმინისტრაციაში დიანა მონდინოს გათავისუფლება დაადასტურეს და აღნიშნეს, რომ მისი გათავისუფლების მიზეზი, არგენტინის მიერ გაერო-ს გენერალურ ასამბლეაში აშშ-ის მიერ კუბის წინააღმდეგ დაწესებული ეკონომიკური ემბარგოს მოხსნის მხარდაჭერა გახდა.

„ჩვენი ქვეყანა კატეგორიულად ეწინააღმდეგება კუბის დიქტატურას და გააგრძელებს იმ საგარეო პოლიტიკის მხარდაჭერას, რომელიც გმობს ყველა რეჟიმს, რომლებიც ადამიანის უფლებებსა და ინდივიდუალურ თავისუფლებებს არღვევენ“, - ნათქვამია არგენტინის პრეზიდენტის ადმინისტრაციის განცხადებაში.