რუსულმა ძალებმა წუხელ უკრაინას „ისკანდერ-მ“ ტიპის ბალისტიკური რაკეტებით, „ხ-59/69“ ტიპის 4 მართვადი საავიაციო რაკეტითა და 92 დრონით შეუტიეს, - ინფორმაციას უკრაინული მედია ქვეყნის საჰაერო ძალებზე დაყრდნობით ავრცელებს.

მათივე ინფორმაციით, რუსებმა თავდასხმა რუსეთის ფედერაციის როსტოვისა და ბელგოროდის ოლქებიდან, კურსკის, პრიმორსკო-ახტარსკის, ორიოლის და ოკუპირებული ყირიმის მიმართულებიდან განახორციელეს.

საჰაერო ძალებში აცხადებენ, რომ მტრის ტაქტიკურმა ავიაციამ მართვადი ბომბებით შეტევა განახორციელა ხარკოვისა და სუმის ოლქებზე.

„ამ დროისთვის დადასტურებულია „ხ-59/69“ ტიპის 4 მართვადი რაკეტისა და 62 უპილოტო საფრენი აპარატის ჩამოგდება ოდესაში, ნიკოლაევში, კიევში, სუმში, ხარკოვში, პოლტავაში, კიროვოგრადში, ჟიტომირში, ჩერნიგოვში, დნეპროპეტროვსკში, ხმელნიცკსა და ივანო-ფრანკოვსკის ოლქებში. უკრაინის სხვადასხვა ოლქში ლოკალურად დაიკარგა მტრის 26 დრონი. ერთი უკრაინის საჰაერო სივრცეშია. საბრძოლო მუშაობა გრძელდება!“ - აცხადებენ უკრაინის საჰაერო ძალებში.