საპროტესტო აქციის მონაწილეები ამ დრომდე რუსთაველის გამზირზე რჩებიან. დემონსტრანტებმა მთელი ღამე გაათენეს და მიუხედავად იმისა, რომ სპეცრაზმი პერიოდულად აქციის მონაწილეებისგან რუსთაველის გამზირის გათავისუფლებას ცდილობს, ისინი ტერიტორიას მაინც არ ტოვებენ. ასევე, რუსთაველის გამზირზე მთელი ღამის განმავლობაში იმოფებოდნენ ოპოზიციონერი ლიდერები.

პარლამენტის მიმდებარე ტერიტორია, მათ შორის, ჭიჭინაძისა და 9 აპრილის ქუჩები აქციის მონაწილეებისგან თავისუფალია და სპეცრაზმს აქვს დაკავებული.

რუსთაველის გამზირზე არის წყლის ჭავლის რამდენიმე მანქანა.

აქციის მონაწილეები რუსთაველის გამზირზე ორ ლოკაციაზე იმყოფებიან: ერთი ნაწილი რუსთაველის თეატრის წინ იმყოფება, ხოლო მეორე ნაწილი კი, სასტუმრო „თბილისი მარიოტის" მიმდებარედ რჩება.

აქციის მონაწილეებს რუსთაველის გამზირზე ნაგვის ურნებით, სკამებით და სხვადასხვა საგნებით ბარიკადები აქვთ აღმართული. ასევე ანთია ცეცხლიც.

შეგახსენებთ, თბილისში 28 ნოემბერს, საპროტესტო გამოსვლები მას შემდეგ დაიწყო, რაც პრემიერ-მინისტრმა, ირაკლი კობახიძემ მმართველი გუნდის გადაწყვეტილება გამოაცხადა, რომ საქართველომ 2028 წლის ბოლომდე დღის წესრიგში არ დააყენებს ევროკავშირთან მოლაპარაკებების გახსნის საკითხს. აქციის მონაწილეები თბილისში ორი ლოკაციაზე - გორგასლის ქუჩაზე, "ქართული ოცნების" ოფისთან და რუსთაველის გამზირზე, პარლამენტის შენობასთან შეიკრიბნენ. მოგვიანებით აქცია გაერთიანდა პარლამენტის წინ, სადაც ვითარება სამართალდამცველებსა და აქციის მონაწილეებს შორის არაერთხელ დაიძაბა.

დაახლოებით, ღამის 2:00 საათის, შემდეგ საპოლიციო ძალებმა დემონსტრანტების გაფრთხილების შემდეგ, რუსთაველის გამზირზე მიმდინარე აქციის დაშლა დაიწყეს. სპეცრაზმი იყენებს წყლის ჭავლსა და სპეციალურ საშუალებებს, მათ შორის ცრემლსადენ გაზს, და ე.წ. წიწაკის სპრეის მომიტინგეთა წინააღმდეგ, თუმცა დემონსტრანტები დაშლას არ აპირებენ და რუსთაველის გამზირის გარკვეულ მონაკვეთზე რჩებიან. ვრცელდება ცნობები დაშავებულთა შესახებ, მათ შორის არიან მედიის წარმომადგენლები და სამართალდამცველებიც. ჯერჯერობით უცნობია რამდენი ადამიანი დაშავდა მიმდინარე საპროტესტო აქციაზე.