ისრაელის საჰაერო ძალებმა სირიაში 250-ზე მეტ სამხედრო ობიექტს დაარტყეს, რაც ერთ-ერთი მასშტაბური ოპერაცია იყო ოპერაცია საჰაერო ძალების ისტორიაში, - „დოიჩე ველეს“ ინფორმაციით, ამის შესახებ ისრაელის არმიის რადიო, Galei Tzahal-ი იუწყება.

გავრცელებული ინფორმაციით, ისრაელის თავდაცვის ძალების სამიზნეებს შორის იყო სირიის ყოფილი პრეზიდენტის, ბაშარ ალ-ასადის სამხედრო ბაზები. დარტყმები ასევე განხორციელდა ათობით მებრძოლზე, ათობით მოიერიშე თვითმფრინავზე, საჰაერო-სარაკეტო სისტემებზე და რაკეტების წარმოების ადგილებსა და საწყობებზე.

თავის მხრივ, ლონდონში დაფუძნებულმა სირიის ადამიანის უფლებათა ობსერვატორიამ განაცხადა, რომ ასადის დამხობის შემდეგ ისრაელმა სირიაში 250-მდე საჰაერო დარტყმა განახორციელა. უფლებადამცველების თქმით, ისრაელის არმიამ გაანადგურა ყველაზე მნიშვნელოვანი სამხედრო ობიექტები სირიაში. საუბარია, მათ შორის, აეროპორტებზე, იარაღისა და საბრძოლო მასალის საცავებზე, ასევე სამხედრო კვლევით ცენტრებზე.

სირიის ადამიანის უფლებათა ობსერვატორიის ცნობით, დარტყმები განხორციელდა სირიის სხვადასხვა პროვინციაში, მათ შორის დეირ ეზ-ზორის, ჰამისა და ჰომსის პროვინციებში, დამასკოში, ასევე ლატაკიაში, სადაც რუსული სამხედრო ბაზებია განთავსებული.

ამასთან, სააგენტო „ფრანს-პრესი“იუწყება, რომ დღეს გამთენიისას დედაქალაქ დამასკოში ძლიერი აფეთქებების ხმები ისმოდა.